Шенген битими мамлакатлари уларга Хорватиянинг қўшилишини қўллаб-қувватлади. Шенген ҳудудига кирувчи 26 та давлатнинг барчаси буни ёқлаб овоз берди.
Хорватия 2023 йил 1 январдан Шенген битими аъзосига айланади.
Еврокомиссия Болгария ва Руминияни ҳам Шенген ҳудудига қабул қилишни таклиф этди, бироқ уларнинг битимга қўшилишини барча мамлакатлар ҳам қўллаб-қувватламади.
Хусусан, Австрия Шенгенга Болгария ва Руминиянинг ҳам қўшилишига қарши чиққан бўлса, Нидерландия Руминияни қўллаб-қувватлаган, аммо Болгарияни рад этган. Шу билан бирга таъкидланишича, Болгария ва Руминия Евроиттифоққа Хорватиядан аввалроқ аъзо бўлган.
Австрия Болгария ва Руминияни Шенген ҳудудида кўришни истамаслигини ушбу мамлакатлар орқали ноқонуний миграциядан хавфсираётгани билан изоҳлади. Ўз навбатида Нидерландия «қонун устуворлиги билан боғлиқ ҳал қилинмаган муаммолар» ва коррупция ва уюшган жиноятчиликка қарши кураш соҳасидаги қонунчилик камчиликлари туфайли Болгариянинг қўшилишига қарши овоз берди.
Шенген зонаси ичкарисида битимни имзолаган мамлакатлар фуқаролари паспорт ва иммиграция назоратисиз кўчиб юра олади. Шунингдек, битим мамлакатларидан бирининг Шенген визасини олган сайёҳлар уни имзолаган бошқа мамлакатларга ҳам ташриф буюриши мумкин.
Шенген битими амал қиладиган Шенген зонаси 1995 йилдан буён мавжуд. Коронавирус пандемияси чоғида Шенген битими мамлакатларида чегаралардаги текширувлар қисман қайта тикланди. 2022 йилда Шенген зонасига кирадиган қатор мамлакатлар Шенген сайёҳлик визаларига эга Россия ва Беларусь фуқароларига ўз ҳудудига киришни тақиқлади.
Изоҳ (0)