Грузиянинг Тбилиси шаҳри халқаро аэропортида ИШИД етакчиларидан бири қўлга олинди. Бу ҳақда Спутник хабар берди.
Маълум қилинишича, террорчи Грузия Давлат хавфсизлик хизматининг аксилтеррор маркази ҳарбийлари томонидан ушланган. Кист миллатига мансуб чечен Цискара Тохосашвили 2015 йилда ИШИД сафида жанг қилиш учун кетган. Унга нисбатан хорижий террорчилик ташкилотига қўшилиш ва террорчилик фаолиятига шерик бўлиш факти бўйича жиноят иши қўзғатилган. Тохосашвили 10 йилдан 17 йилгача озодликдан маҳрум этилиши мумкин.
Яқин Шарқда Тохосашвили Амир Исо номи билан машҳур бўлган. У Сурия ва Ироқ ҳудудида террорчилик фаолияти ва жанговар ҳаракатларда иштирок этган. «Маълум вақт давомида можаро зонасида террорчилик ташкилоти бўлинмаларидан бирига раҳбарлик қилган», — дейилади хабарда.
2019 йилда Тохосашвилининг укаси Цезарь Тохосашвили террорчилар доирасида Киевда ҳибсга олинган. Шундан сўнг у мамлакат Бош прокуратураси талабига биноан Грузияга экстрадиция қилинган. У худди шундай айбловлар билан узоқ муддатга қамалган.
2014—2015 йилларда Панкиси дарасидан юзлаб Кист чеченлари ИШИД сафида жанг қилиш учун кетган. Грузияда уларга қарши жиноий иш қўзғатилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Мавзуга доир:
Изоҳ (0)