Рэпер Канье Уэст Американинг ўта ўнг, неофашистик ташкилоти бўлган Proud Boys асосчиси Гевин Макиннесга берган интервьюсида яҳудийларни Адольф Гитлерни кечиришга чақирди, деб ёзади Business Standart.
Saving Ye («Йени қутқариш») деб ном олган 45 дақиқалик интервьюда юзини ниқоб билан ёпиб олган рэпер ўзининг «яҳудийлар аксарият ОАВларни, шунингдек, банкларни, кўчмас мулк ва савдо марказларини назорат қилиши» ҳақидаги даъволарини такрорлаган.
Рэпер яҳудийларни Гитлерни бадном қилишда айблади. Гитлер уларни мамлакатдан қувиб чиқаргани учун улар дарғазаб бўлган, шу сабабли ҳам улар Гитлернинг обрўсини тўккан, деди қўшиқчи.
«Яҳудийлар менга кимни яхши кўришим мумкинлиги ёки мумкин эмаслигини буюра олмайди. Ўз оғриғини бошқаларга ҳам зўрлаб ўтказиш керак эмас. Бугун яҳудий халқи Гитлерни кечириши керак», — деди Уэст.
Макиннеснинг ўзи интервью бошида «Йенинг антисемит ёки нацистга айланишига йўл қўймаслик» истаги ҳақида айтганди.
Аввалроқ Канье Уэст Гитлерни хуш кўришини эътироф этганди. У Гитлернинг яхши томонларини кўришини айтган.
Сўнгги вақтларда рэпернинг турли гап-сўзлари жамоатчилик орасида шов-шув ва норозиликларга сабаб бўлмоқда.
Хусусан, у полициячилар қўлида ҳалок бўлган Жорж Флойдни наркотиклар қабул қилишда айблаганди. Кейинроқ эса ушбу гаплари учун узр сўраган.
Октябрь ойида қўшиқчи Париждаги мода ҳафталигида оқтанлилар устунлигини билдирувчи White Lives Matter («Оқтанлилар ҳаёти аҳамиятга эга») шиори туширилган футболка кийиб келганди. Жамоатчилик орасидаги норозиликлар билан бирга, бу Уэст учун кўплаб машҳур брендлар билан шартномаларнинг бекор бўлиши ва ижтимоий тармоқлардан блокланиш билан тугаган.
Adidas Уэст билан ҳамкорликни тугатгач, кузда Forbes артистнинг бойлигини 400 миллион долларга баҳолади. Шу тариқа, у миллиардерлар рўйхатидан чиқиб кетди.
Инсониятга қарши кўп сонли жиноятлар Гитлернинг номи билан боғлиқдир. У Германия бошчилигида 1939 йилда Иккинчи жаҳон урушини бошлади, унинг оқибатида эса ўн миллионлаб одамлар ҳалок бўлди. 1933 йилдан 1945 йилгача Германия давлатида, Учинчи рейхга иттифоқдош мамлакатларда ва босиб олинган ҳудудларда яҳудийлар мунтазам таъқиб этилган ва йўқ қилинган. Холокост натижасида турли ҳисоб-китобларга кўра, Европа яҳудийларининг қарийб 60 фоизи ҳалок бўлган.
Изоҳ (0)