АҚШ Россиядаги нишонларга зарбалар бериш борасида Украинани рағбатлантирмайди ва унга бундай имкониятларни тақдим этмайди. Бу ҳақда АҚШ давлат котиби Энтони Блинкен Россиядаги ҳарбий аэродромларга ҳужумлар ҳақидаги маълумотлар юзасидан изоҳ бераётиб айтиб ўтди.
«Биз украиналикларни Россия ичкарисига зарбалар беришга рағбатлантирмаганмиз ва уалрга бунинг учун имкониятларни тақдим этмаганмиз. Лекин украиналиклар Россиянинг ўз мамлакатларига қарши давом этаётган тажовузи шароитида ҳар куни нималарни бошидан кечираётганини англаш муҳимдир. Биз бутун дунё бўйлаб шерикларимиз билан бирга украиналикларни ўз-ўзини ҳимоя қилиш, ўз ҳудудлари ва ўз озодлигини ҳимоя қилиш учун зарур бўлган барча нарса билан таъминлашга қатъиян тайёрмиз», — деди у.
Жо Байден маъмурияти Киевга узоқ масофали қурол-яроғ етказишдан бош тортмоқда, бироқ, Пентагон раҳбари Ллойд Остин маълум қилишича, АҚШ Украинанинг бундай зарба салоҳиятини ривожлантириш бўйича ўз саъй-ҳаракатларига халал бермайди.
Расман эса Давлат департаменти Россия ҳарбий аэродромларига дронлар ҳужуми учун ким жавобгар экани ҳақида маълумотга эга эмаслигини айтмоқда.
Аввалроқ The New York Times украиналик юқори мансабли амалдорга таяниб 5 декабрь куни Россиянинг Саратов ва Рязань вилоятларида аэродромларга ҳужум қилган дронлар Украина ҳудудидан учирилгани ҳақида хабар берганди.
Украиналик мансабдорлардан бири The Washington Post’га маълум қилишича, 6 декабрь куни Курск вилоятидаги аэродромга Украина дрони ёрдамида яна битта, учинчи ҳужум ҳам уюштирилган.
Изоҳ (0)