Reper Kanye Uest Amerikaning o‘ta o‘ng, neofashistik tashkiloti bo‘lgan Proud Boys asoschisi Gevin Makinnesga bergan intervyusida yahudiylarni Adolf Gitlerni kechirishga chaqirdi, deb yozadi Business Standart.
Saving Ye (“Yeni qutqarish”) deb nom olgan 45 daqiqalik intervyuda yuzini niqob bilan yopib olgan reper o‘zining “yahudiylar aksariyat OAVlarni, shuningdek, banklarni, ko‘chmas mulk va savdo markazlarini nazorat qilishi” haqidagi da’volarini takrorlagan.
Reper yahudiylarni Gitlerni badnom qilishda aybladi. Gitler ularni mamlakatdan quvib chiqargani uchun ular darg‘azab bo‘lgan, shu sababli ham ular Gitlerning obro‘sini to‘kkan, dedi qo‘shiqchi.
“Yahudiylar menga kimni yaxshi ko‘rishim mumkinligi yoki mumkin emasligini buyura olmaydi. O‘z og‘rig‘ini boshqalarga ham zo‘rlab o‘tkazish kerak emas. Bugun yahudiy xalqi Gitlerni kechirishi kerak”, — dedi Uest.
Makinnesning o‘zi intervyu boshida “Yening antisemit yoki natsistga aylanishiga yo‘l qo‘ymaslik” istagi haqida aytgandi.
Avvalroq Kanye Uest Gitlerni xush ko‘rishini e’tirof etgandi. U Gitlerning yaxshi tomonlarini ko‘rishini aytgan.
So‘nggi vaqtlarda reperning turli gap-so‘zlari jamoatchilik orasida shov-shuv va noroziliklarga sabab bo‘lmoqda.
Xususan, u politsiyachilar qo‘lida halok bo‘lgan Jorj Floydni narkotiklar qabul qilishda ayblagandi. Keyinroq esa ushbu gaplari uchun uzr so‘ragan.
Oktabr oyida qo‘shiqchi Parijdagi moda haftaligida oqtanlilar ustunligini bildiruvchi White Lives Matter (“Oqtanlilar hayoti ahamiyatga ega”) shiori tushirilgan futbolka kiyib kelgandi. Jamoatchilik orasidagi noroziliklar bilan birga, bu Uest uchun ko‘plab mashhur brendlar bilan shartnomalarning bekor bo‘lishi va ijtimoiy tarmoqlardan bloklanish bilan tugagan.
Adidas Uest bilan hamkorlikni tugatgach, kuzda Forbes artistning boyligini 400 million dollarga baholadi. Shu tariqa, u milliarderlar ro‘yxatidan chiqib ketdi.
Insoniyatga qarshi ko‘p sonli jinoyatlar Gitlerning nomi bilan bog‘liqdir. U Germaniya boshchiligida 1939-yilda Ikkinchi jahon urushini boshladi, uning oqibatida esa o‘n millionlab odamlar halok bo‘ldi. 1933-yildan 1945-yilgacha Germaniya davlatida, Uchinchi reyxga ittifoqdosh mamlakatlarda va bosib olingan hududlarda yahudiylar muntazam ta’qib etilgan va yo‘q qilingan. Xolokost natijasida turli hisob-kitoblarga ko‘ra, Yevropa yahudiylarining qariyb 60 foizi halok bo‘lgan.
Izoh (0)