Нью-Йорк маъмурияти каламушларга қарши кураш бўйича шаҳар хизмати раҳбари лавозимига номзодлар қидирилаётгани ҳақида расмий эълон берди, бунга мегаполисга каламушлар ҳужуми билан боғлиқ мушкул муаммо сабаб бўлди.
«Айнан сиз кемирувчиларга қарши кураш бўйича бошлиқ лавозимида бизга бу каламушларни шаҳардан қувиб юборишда ёрдам беришингиз мумкин. Агар сизда қотил инститнкти бўлса, бугуноқ ариза беринг», — деб ёзди шаҳар мери Эрик Адамс Twitter’да.
Лавозим расман «шаҳардаги кемирувчиларга қарши кураш бўйича директор» деб номланади. Бундай мутахассис «каламушларни тийиб туриши ва назорат қилиши» керак бўлади, дейилади эълонда.
«Кемирувчилар касалликлар тарқатади, уйларга, электр симларига зарар етказади… Каламушларга ишга қабул қилиш ҳақидаги бу эълон хуш келмайди, аммо 8,8 миллион ню-ёркликлар, сизнинг шаҳрингиз ҳукумати каламушлар сонини қисқартириш, тозаликни ошириш ва касалликлар тарқалишининг олдини олиш йўлида сиз билан ишлашга тайёр», — дейилади Нью-Йорк маъмурияти хабарида.
Ушбу лавозимга даъвогарлар огоҳлантирилишича, улар кеча-ю кундуз ишлашига тўғри келади. Унинг вазифаларига каламушларга қарши кураш бўйича ишни мувофиқлаштириш, тегишли стратегияни ишлаб чиқиш ҳамда шаҳар ҳукумати ва мутахассислар билан ҳамкорлик қилиш киради. Каламушларга қарши курашувчининг йиллик маоши 120—170 минг доллар оралиғида бўлади.
Нью-Йоркда каламушлар 1700 йиллардан буён яшаб келади, улар Европадан кўчиб келган кишилар томонидан келтирилган. Аввалги йилларда мегаполис ҳукумати кемирувчиларга қарши курашга миллионлаб доллар маблағ йўналтиришга ваъда берганди. Шу пайтгача қўлланилган чоралар, шу жумладан, каламушларни итлар ёрдамида қириб ташлаш усули самарали бўлиб чиқмади.
Айни пайтда эса ижтимоий тармоқларда Нью-Йорк каламушлари билан боғлиқ шов-шувли видео тарқалмоқда. Унда «кўча овқати» сифатида грилда пиширилаётган каламушларни кўриш мумкин.
Изоҳ (0)