Украина 24 февралдан кейин Россия томонидан эгаллаб олинган ҳудудларини қайтариб олиши учун АҚШ унга ёрдам беришда давом этмоқда, деди АҚШ давлат котиби Энтони Блинкен The Wall Street Journal конференциясида.
«Бизнинг эътиборимиз ўзимиз қилаётган нарсани давом эттиришга қаратилган, яъни Украина 24 февралдан буён босиб олинган ҳудудларини қайтариб олиши, Россияга қаршилик кўрсатиши, ўз-ўзини ҳимоя қилиши учун керак бўлган ҳамма нарсага эга эканига ишонч ҳосил қилишга йўналтирилган», — деди Блинкен ва Киевга ҳарбий ёрдамдан ташқари, иқтисодий ва гуманитар кўмак ҳам зарурлигини қўшиб қўйди.
Журналистнинг Украина Қримни қайтариб олмоқчилиги ҳақидаги саволига жавоб берар экан, АҚШ давлат котиби украиналиклар «қаерга боришни хоҳлаши, буни қачон ва қандай қилиши ҳақида ўзлари қарор қабул қилиши»ни таъкидлади.
Сентябрь охирида ДХР, ЛХР, Запорожье ва Херсон вилоятлари референдумлар натижаларига кўра Россия таркибига кирганди. Шундан кейин Украина президенти Владимир Зеленский Қрим, Донбасс, Херсон ва Запорожье вилоятлари мустақиллигини тан олмаслик ҳақида фармон имзолади. У, шунингдек, Қримни қайтариб олиш режалари ҳақида ҳам гапирганди.
АҚШ Россия ҳарбий операцияси бошланганидан буён Киевга ҳарбий ёрдам кўрсатиб, қурол-яроғ, ҳарбий техника етказиб бермоқда ва украиналик ҳарбийларни ўқитмоқда. Шу билан бирга, АҚШ президенти Жо Байден АҚШ Украина ва Россия низосига бевосита аралашиш ва ўз қўшинларини киритиш нияти йўқлигини кўп бора такрорлаган.
Россия президенти матбуот котиби Дмитрий Песков Вашингтон томонидан Киевга қурол етказилиши низони чўзиб юбориши ва уни янада «оғриқлироқ» қилишини, аммо якуний натижага таъсир ўтказмаслигини айтганди.
Изоҳ (0)