АҚШ ўзи Украинага ҳарбий кўмак сифатида тақдим этган HIMARS баравар ўт очиш реактив тизимларини яширинча модификация қилиб, уларни Россия ҳудудларига узоқ масофали ракеталар учириш имкониятидан маҳрум этган. Бу ҳақда The Wall Street Journal Америка маъмуриятидаги манбаларига таяниб хабар берди.
Вашингтон Москва билан низо кучайиб кетиши хавфини камайтириш учун шундай чора кўрган, дейди газета суҳбатдошлари.
Хусусан, модификация қилинган қурилмалардан парвоз масофаси 300 километргача бўлган ATACMS ракеталарини учириш учун фойдаланиб бўлмайди. АҚШ Украинага бундай ракеталарни етказиб бермаган, бироқ Киев ATACMS’ни бошқа манбалардан олган тақдирда, уларни HIMARS орқали қўллаш имкониятини чеклаб қўйди.
Украина АҚШдан 20 та HIMARS старт қурилмаларини ва парвоз масофаси 80 километргача бўлган ракеталарнинг катта захирасини қабул қилиб олганди. Бу ракеталар Украина қуролли кучлари томонидан Россия босиб олган ҳудудларда уларнинг ўқ-дори омборлари ва қўмондонлик марказларига зарбалар бериш учун қўлланилади. Таъкидланганидек, HIMARS топширилаётган вақтида президент Владимир Зеленский АҚШга улар Россия ҳудудидаги нишонларга зарбалар беришда қўлланилмаслиги ҳақида шахсан ўзи ваъда берганди.
Изоҳ (0)