Fitch Ratings 2023 йил учун глобал ялпи ички маҳсулот ўсиши прогнозини 1,7 фоиздан 1,4 фоизга туширди. Бу ҳақда «Дарё»га халқаро рейтинг агентлигининг пресс-релизидан маълум бўлди.
Марказий банклар инфляцияга қарши курашни кучайтиргани ва Хитойнинг мулк бозори прогнози ёмонлашгани сабабли 2023 йил учун жаҳон ялпи ички маҳсулоти прогнозлари яна қайта кўриб чиқилди, — дейилади Fitch Ratings’нинг Глобал иқтисодий истиқбол (ГЕО) ҳисоботида.
Fitch, шунингдек, АҚШ иқтисодиёти учун 2023 йилга мўлжалланган ўсиш прогнозини 0,5 фоиздан 0,2 фоизгача пасайтирди, чунки мамлакатда пул-кредит сиёсатининг кескинлашув суръати ошмоқда.
Хитойнинг 2023 йилга мўлжалланган ЯИМ ўсиши прогнози уй-жой бозорини тиклаш истиқболлари заифлашгани сабабли 4,5 фоиздан 4,1 фоизга туширилди.
Хитойнинг 2022 йил учун иқтисодий ўсиш прогнози 2,8 фоиз даражасида қолмоқда, чунки COVID-19 ҳолатларининг кўпайиши яқин муддатли фаолиятга босим ўтказмоқда.
2023 йил учун Европанинг ўсиш прогнози -0,1 фоиздан 0,2 фоизгача қайта кўриб чиқилди, чунки минтақадаги газ инқирози бироз пасайди. Аммо Марказий банк ставкаларининг кескин ошиши талабга босим ўтказади.
Агентликнинг фикрича, бу қишда Европада табиий газ танқислиги хавфи камайган, чунки суюлтирилган газ (LNG) импорти ошиб, газ истеъмоли қисқарган.
Аммо инқироз ҳали тугамаган. Газнинг юқори улгуржи нархлари фирмалар ва уй хўжаликларининг харажатларига катта таъсир кўрсатишда давом этмоқда, — дейди улар.
Шу билан бирга, яқинда Европа Иттифоқи ва Буюк Британияда инфляция 11 фоизга етди ва базавий инфляция ўсиб бормоқда.
Агентлик тахминларига кўра, озиқ-овқат ва энергия нархлари барқарорлашгани сабабли 2023 йилда инфляция даражаси сезиларли даражада пасаяди.
Fitch Федерал захира тизими (Фед) ставкасининг энг юқори чўққиси 5 фоиз ва Европа Марказий банк (ЭCБ) 3 фоиз бўлишини тахмин қилмоқда.
Монетар кескинлашувнинг иқтисодиётга таъсири айниқса уй-жой бозорларида кўринмоқда. Лекин вақт ўтиши билан талаб ва меҳнат бозорлари учун кенгроқ таъсирлар янада аниқроқ бўлади, — дейилади ҳисоботда.
Европа Иттифоқи ва Буюк Британияда рецессия 2022 йил охирида, АҚШда эса 2023 йилнинг 2-3-чоракларида бошланиши кутилмоқда. 2023 йилда АҚШ ва Буюк Британияда ишсизлик даражаси 5 фоиздан ошиши мумкин.
Шу билан бирга, сўнгги пайтларда таъминот занжирларидаги кескинликнинг юмшаши глобал ялпи ички маҳсулотнинг илгари кутилганидан кўра кўпроқ ўсишини таъминлаши мумкин.
Аввалроқ нима сабабдан дунё бўйлаб ўртача иш ҳақи камайиб кетгани таҳлил қилингани ҳақида хабар берилганди.
Изоҳ (0)