Россия нефтига нархнинг юқори чегарасини жорий этиш ушбу ёқилғи нархини пасайтиришга ёрдам бериши керак. Бу ҳақда Япония Вазирлар Маҳкамаси бош котиби Хироказу Мацунога таяниб «РБК» хабар бермоқда.
Мен бу чора қанчалик самара бериши ҳақида тахмин қилмайман. Лекин чеклов нархларнинг пасайишига хизмат қилса ҳам, баъзи давлатлар ундан бевосита фойдаланмайди, — деди Хироказу Мацуно.
Мацунонинг сўзларига кўра, Токио вазиятни кузатиб боради ва бу борада G7 давлатлари билан ишлайди. Япония нархларни чеклашни жорий этишни Россия даромадларини камайтириш учун самарали восита, деб ҳисоблайди.
Япония G7 давлатлари аъзоси сифатида 5 декабрдан бошлаб денгиз орқали етказиб бериладиган нефть нархига 60 долларлик чегара жорий этишга қарор қилган дунёнинг 32 давлатидан бири.
АҚШ, Канада, Буюк Британия, Германия, Франция ва бошқа Европа Иттифоқи мамлакатлари, шунингдек, Австралия ҳам буни амалга оширди.
Ғарб бу чорани нафақат Россияни нефть ва газ даромадларининг бир қисмидан маҳрум қилиш, балки энергетика инқирози фонида камбағал мамлакатларга углеводород етказиб беришни таъминлаш учун қўллашга қарор қилди.
2 декабрда Евроиттифоқ Кенгаши Россия нефтининг нархини қайта кўриб чиқиш механизми билан бир баррель учун 60 доллардан чеклаш қарорини расман тасдиқлаган.
Элчилар ҳозиргина денгиз орқали ташиладиган Россия нефтининг нархини чеклаш бўйича келишувга эришди. Ёзма тартиб амалга оширилади, қарор ЕИнинг расмий журналида эълон қилинганидан сўнг кучга киради, — дейилади Чехиянинг ЕИ Кенгашидаги раислиги Twitter’да.
Аввалроқ Россия Европа Иттифоқи жорий этган нефть нархи чегарасини қабул қилишдан бош тортгани ҳақида хабар берилганди.
Изоҳ (0)