Fitch Ratings 2023-yil uchun global yalpi ichki mahsulot o‘sishi prognozini 1,7 foizdan 1,4 foizga tushirdi. Bu haqda “Daryo”ga xalqaro reyting agentligining press-relizidan ma’lum bo‘ldi.
Markaziy banklar inflyatsiyaga qarshi kurashni kuchaytirgani va Xitoyning mulk bozori prognozi yomonlashgani sababli 2023-yil uchun jahon yalpi ichki mahsuloti prognozlari yana qayta ko‘rib chiqildi, — deyiladi Fitch Ratings’ning Global iqtisodiy istiqbol (GEO) hisobotida.
Fitch, shuningdek, AQSH iqtisodiyoti uchun 2023-yilga mo‘ljallangan o‘sish prognozini 0,5 foizdan 0,2 foizgacha pasaytirdi, chunki mamlakatda pul-kredit siyosatining keskinlashuv sur'ati oshmoqda.
Xitoyning 2023-yilga mo‘ljallangan YIM o‘sishi prognozi uy-joy bozorini tiklash istiqbollari zaiflashgani sababli 4,5 foizdan 4,1 foizga tushirildi.
Xitoyning 2022-yil uchun iqtisodiy o‘sish prognozi 2,8 foiz darajasida qolmoqda, chunki COVID-19 holatlarining ko‘payishi yaqin muddatli faoliyatga bosim o‘tkazmoqda.
2023-yil uchun Yevropaning o‘sish prognozi -0,1 foizdan 0,2 foizgacha qayta ko‘rib chiqildi, chunki mintaqadagi gaz inqirozi biroz pasaydi. Ammo Markaziy bank stavkalarining keskin oshishi talabga bosim o‘tkazadi.
Agentlikning fikricha, bu qishda Yevropada tabiiy gaz tanqisligi xavfi kamaygan, chunki suyultirilgan gaz (LNG) importi oshib, gaz iste’moli qisqargan.
Ammo inqiroz hali tugamagan. Gazning yuqori ulgurji narxlari firmalar va uy xo‘jaliklarining xarajatlariga katta ta’sir ko‘rsatishda davom etmoqda, — deydi ular.
Shu bilan birga, yaqinda Yevropa Ittifoqi va Buyuk Britaniyada inflyatsiya 11 foizga yetdi va bazaviy inflyatsiya o‘sib bormoqda.
Agentlik taxminlariga ko‘ra, oziq-ovqat va energiya narxlari barqarorlashgani sababli 2023-yilda inflyatsiya darajasi sezilarli darajada pasayadi.
Fitch Federal zaxira tizimi (Fed) stavkasining eng yuqori cho‘qqisi 5 foiz va Yevropa Markaziy bank (ECB) 3 foiz bo‘lishini taxmin qilmoqda.
Monetar keskinlashuvning iqtisodiyotga ta’siri ayniqsa uy-joy bozorlarida ko‘rinmoqda. Lekin vaqt o‘tishi bilan talab va mehnat bozorlari uchun kengroq ta'sirlar yanada aniqroq bo‘ladi, — deyiladi hisobotda.
Yevropa Ittifoqi va Buyuk Britaniyada retsessiya 2022-yil oxirida, AQSHda esa 2023-yilning 2-3-choraklarida boshlanishi kutilmoqda. 2023-yilda AQSH va Buyuk Britaniyada ishsizlik darajasi 5 foizdan oshishi mumkin.
Shu bilan birga, so‘nggi paytlarda ta’minot zanjirlaridagi keskinlikning yumshashi global yalpi ichki mahsulotning ilgari kutilganidan ko‘ra ko‘proq o‘sishini ta’minlashi mumkin.
Avvalroq nima sababdan dunyo bo‘ylab o‘rtacha ish haqi kamayib ketgani tahlil qilingani haqida xabar berilgandi.
Izoh (0)