Номаълум шахслар Украинанинг Остонадаги элчихонасига бино миналангани ҳақида электрон почта хати жўнатган, деб хабар бермоқда Қозоғистон Ички ишлар вазирлиги Telegram каналида.
Ҳодиса 1 декабрь куни содир бўлган. Ўша куни кечқурун элчихона полицияга мурожаат қилиб, хабар 15:08 (Тошкент вақти билан 14:08) да олинганини айтган. Бинога етиб келган Махсус хизматлар ходимлари портловчи мосламаларни топмаган, текширув жараёнида ҳеч ким эвакуация қилинмаган.
«Факт Есил тумани ИИБнинг маълумотлар ҳисоби китобида қайд этилди. Полиция ҳодисага алоқадор шахсларни қидирмоқда», — дейилади хабарда.
Охирги бир неча кун ичида Украинанинг бир қатор мамлакатлардаги элчихоналарига ҳақиқий ёки қалбаки портловчи қурилмалар ёки бўлмаса, сигир, чўчқа кўзлари ва жониворларнинг бошқа аъзолари солинган 17 та аноним почта жўнатмалари юборилган.
«Ҳаммаси Украинанинг Испаниядаги элчихонаси яқинида юз берган портлашдан бошланди. Лекин бу портлашдан кейинги ҳодисалар янада ғайритабиийроқ ва айтиш жоиз бўлса, носоғломроқдир», — деди Украина ташқи ишлар вазири Дмитрий Кулеба.
30 ноябрь куни Украинанинг Мадриддаги элчихонасида портлаш содир бўлганди, оқибатда хавфсизлик хизмати ходими жароҳатланди. Портловчи қурилма элчи Сергей Погорельсэвга йўлланган хат ичида бўлган. У портловчи қурилмадан иборат пакет юборилиши ортида Россия турганини тахмин қилди.
Кулеба ҳам ушбу жўнатмалар «Украина халқаро майдонда Россия учун яратган дипломатик даҳшат»га жавоб бўлганини тахмин қилди. Воқеалар учун ёки Москва, ёки унга мойиллик билдириб, «қўрқув уруғини сочишга интилаётганлар» масъул, деб ҳисоблайди у.
Изоҳ (0)