Украинадаги жанговар ҳаракатлар суръати пасайди, деб маълум қилди АҚШ Миллий разведка бошқармаси директори Эврил Хейнс. У ушбу динамика яқин келажакда давом этишини прогноз қилмоқда.
«Биз можаронинг ўзига хос тарзда секинлашувини кўряпмиз... ва бу келгуси ойларда давом этиши мумкинлигини кутмоқдамиз», — деди Хейнс хоним Калифорнияда Роналд Рейган миллий мудофаа форумидаги чиқишида.
АҚШ разведкаси маълумотларига кўра, Россия ва Украина томонлари қишдан кейинги қарши ҳужумга тайёргарлик кўриш мақсадида захираларни қайта тўлдиришга интилмоқда. «Россияликлар бунга тайёр бўлиш-бўлмаслигига шубҳа билан қараяпмиз. Мен украиналиклар ҳақида (уларнинг захираларни тўлдиришга тайёрлиги ҳақида — «Дарё» изоҳи) кўпроқ оптимистик ўйлайман», —дея қўшимча қилди Америка разведкаси раҳбари.
Хейнс хонимнинг фикрича, Россия президенти Владимир Путиннинг Украинага нисбатан сиёсий мақсадлари ўзгармаган, бироқ разведка таҳлилчилари у қисқа муддатли ҳарбий мақсадларни «кейинроқ бу масалага қайтса бўлади, деган фикр билан вақтинчалик камайтириши» мумкин, деб ҳисобламоқда.
АҚШ разведкаси Россиянинг ҳарбий захиралари, жумладан, аниқ бошқариладиган ўқ-дорилари «жуда тез» тугаяпти, деб баҳоламоқда. Хейнс, шунингдек, КХДРдан Россияга ўқ-дорилар етказиб берилаётганини қайд этди, бироқ «улар кам» эканини таъкидлади, Эронни эса Россияи дронлар билан таъминлаганликда яна бир бор айблади. Шимолий Корея ва Эрон расмийлари Россияга қурол етказиб бераётганини тан олмаяпти.
Россия 24 февралдан бери Украинада Владимир Путин буйруғи билан ҳарбий амалиёт ўтказмоқда. Сентябрь ойи охирида Россия Федерацияси Донецк ва Луганск халқ республикалари, Херсон ва Запорожье вилоятларини аннексия қилди.
Изоҳ (0)