«Россиянинг ядровий риторикаси» Финляндияни НАТОга аъзо бўлиш учун ариза беришга ундаган асосий омил бўлди. Бу ҳақда Финляндия ташқи ишлар вазири Пекка Хаависто Kyodo агентлигига берган интервьюсида маълум қилди.
Вазирнинг сўзларига кўра, Россиянинг Украинадаги босқини бошланиши «Европада хавфсизлик ҳақиқати ўзгарганини» кўрсатди, «Москванинг ядровий таҳдидлари» эса Хелсинкини қандай жавоб қайтариш ва қаердан ёрдам олиш ҳақида ўйлашга мажбур қилди.
Финляндия ва Швеция май ойида НАТОга кириш учун ариза топширганди. Бу жараён альянснинг барча 30 аъзоси томонидан ратификация талаб қилади, бироқ Венгрия ва Туркия буни маъқулламаган.
Финляндия ташқи ишлар вазири Венгрия икки мамлакатнинг альянсга қўшилишини февраль ойи бошида маъқулламоқчилигини таъкидлаб, «ҳаммаси баҳорда ҳал бўлишига», жумладан Туркия томонидан тегишли ҳужжат ратификация қилинишига умид билдирди.
Изоҳ (0)