Эрон ҳукумати мамлакат бўйлаб давом этаётган кенг кўламли намойишлар ва тартибсизликлар фонида ахлоқ полициясини тугатди. Бу ҳақда Эрон бош прокурори Муҳаммад Жафар Монтазери маълум қилди, деб хабар бермоқда Ал-Арабия.
«Ахлоқ полициясининг суд тизимига ҳеч қандай алоқаси йўқ ва у ёпилди», — деди бош прокурор.
Бундан ташқари Эрон ҳукумати аёлларнинг ҳижоб ўрашини талаб қилувчи қонунни ўзгартириш устида иш бошлаган.
«Парламент ҳам, суд тизими ҳам шу масала устида ишламоқда», — деди бош прокурор ва бу органлар қонунни айнан қандай ўзгартиришига аниқлик киритмади. Унинг сўзларига кўра, 30 ноябрь куни экспертлар гуруҳи парламентнинг маданият масалалари бўйича комиссияси билан учрашган, «бир-икки ҳафта ичида натижани кўрамиз».
Эронда 1979 йилги ислом инқилобидан кейин аёллар учун ҳижоб ўраш мажбурий бўлди, бироқ кўплаб эронлик аёллар бу талабни эътиборсиз қолдирган. 2022 йил июль ойида Эрон расмийлари уларнинг наздида ҳижобни нотўғри ўраган аёлларга нисбатан ҳижоб ва иффат тўғрисидаги қатъий қонунни қабул қилди. Аёлларга сочларини, бўйин ва елкаларини ёпиб турувчи рўмол ўраш шарт этиб белгиланди, ахлоқ полицияси эса янги қоидани бузганларни ҳибсга олишни бошлади.
Сентябрь ойининг охирида Эронда 22 ёшли Маҳса Амини ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланди. Улар бутун мамлакат бўйлаб ҳалигача давом этмоқда. Намойишлар куч тузилмалари томонидан шафқатсизлик билан бостирилмоқда.
Эрон расмийларига кўра, намойишлар чоғида 200 га яқин одам ҳалок бўлган. Ҳуқуқ ҳимоячиларининг айтишича, 2 декабрь ҳолатига кўра Эронда 469 намойишчи ўлдирилган, улардан 64 нафари вояга етмаганлар. 18 мингдан ортиқ намойишчи ҳибсга олинган.
Изоҳ (0)