«Жўқорғи Кенгес депутатлари жудаям пассив бўлган, улар халқ билан мулоқот қилганда бу воқеалар бўлмасди» — Лолагул Қаллиханова

Нукус воқеаларида айбланаётганлар судида сўз олган Лолагул Қаллиханова Жўқорғи Кенгес депутатлари жудаям пассив бўлганини, халқ билан етарли даражада мулоқот қилмаганини айтди.

Олдин айтилганидек, Жўқорғи Кенгес депутатлари жуда пассив бўлган. На фуқаролик, на депутатлик позициясини билдирган. Шунчаки, пассив одамлар бўлган, холос. Агар улар халқ билан бироз маслаҳат қилганида бундай нарса бўлмасди. Шунинг учун мен шундай деб айтганман. Бу қонунбузилиши эканлигидан хабарим бор. Жавобгарликдан қочмайман, — деди судда сўз олган журналист.

Лолагул Қаллиханова суднинг «28 июнь куни эрталабки соат 07:31 да Telegram’даги «Makan.uz» каналида Даулетмурат Тажимуратов иштирокида 22 нафар адвокат йиғилиши бўйича видеоматериал жойлаштирилган. Тажимуратов қатнашган бу йиғилиш материалини Сизга каналга жойлашни ким тавсия қилганди?», — дея берилган саволга «Ҳеч ким тавсия қилмаган. Каналимда кўрган бўлсангиз, Қорақалпоғистонда бўлаётган барча нарсани, флешмоб видео бўлсин, фикр бўлсин ҳаммасини жойлаб келганман. Ҳеч ким тавсия қилмаган. Ўз ташаббусим билан қилганман», — деди.

Судья саволини давом эттириб, «Бу видеоматериал Тажимуратовга тегишли каналда 29 июнь куни эълон қилинган. Сиз бу материални бир кун олдин жойлаштиргансиз а?», деб сўради. Бунга жавоб берган журналист «Менга Telegram-ботга келганди. Ботга келган нарсани чиқарганман. Маканузбот дегани бор», — деди.

Лолагул Қаллиханова Telegram каналига жойлаган видеосини шарҳлар экан, «Очиғи адвокат бўлганидан кейин бир нарсани билмаса гапримаса керакдир деб ўйлагандим», — деди.

Қаллиханованинг айтишича, Тажимуратовнинг одамларни намойиш ўтказишга дават қилингани кўринган видео ҳам унинг Telegram ботига келган.

«Бу видеоматериални каналингизда эълон қилишдан мақсад нима эди?», — деган саволга жавоб берган журналист «Қорақалпоғистонда шундай воқеа бўляпти. Халқ шу даражага етиб келди», деган мақсадда чиқарилган деди.

«Макан» интернет-нашрининг собиқ маъмури Лолагул Қаллихонова судда ўз айбига тўлиқ иқрор бўлди.

Биз жуда катта хатога йўл қўйдик, ўз юртимизга тош отдик. Тартибсизликлар пайтида ҳар бир инсоннинг ўлими унинг виждонига боғлиқ ва ҳеч қандай қамоқ жазоси бу хатти-ҳаракатларни оқлай олмайди, — деди у.

Мавзуга доир: 

• Нукус воқеаларида айбланаётганлар устидан суд иши бошланди (фото)
• Нукус воқеаларида айбланаётганлар суди давом этмоқда: асосий гумонланувчилардан бири иккинчисини фирибгар деб атади
• Нукусдаги тартибсизликлар оқибатида етказилган зарар миқдори маълум бўлди
• Қорақалпоғистондаги тартибсизликлар бўйича суд: ким нимада айбланаётгани маълум қилинди