Фарғонада ДХХ ва бошқа ҳуқуқ-тартибот идоралари билан ҳамкорликда ўтказилган тезкор-қидирув тадбирлари натижасида наркотик моддаларн ноқонуний айланмасига чек қўйилди. Бу ҳақда «Ўзбекистон 24» телеканалининг «Янгиликлар» информацион дастурида хабар берилди.

Хусусан, Фарғона шаҳрида яшовчи, муқаддам гиёҳвандлик воситалари савдоси билан боғлиқ жиноят содир этгани учун судланган 44 ёшли фуқаронинг уйи атрофи текширилганда, ерга кўмиб қўйилган 21 килограмм 579 грамм гашиш моддаси борлиги аниқланган.

Маълум бўлишича, тожикистонлик наркокурьерлар томонидан контрабанда йўли билан олиб келинган ушбу гиёҳвандлик воситасини у Тошкент шаҳри ҳамда Фарғона водийси вилоятларида сотишни режалаштирган.

Мазкур шахснинг жиноий шеригини аниқлаш мақсадида тезкор тадбир давом эттирилиб, Фарғона—Тошкент йўналишида ҳаракатланиб кетаётган Nexia Наманган вилоятининг Поп тумани ҳудудида тўхтатилиб, кўздан кечирилган.

Натижада Фарғона туманида истиқомат қилувчи, 39 ёшли фуқаро бошқарувидаги автомашина юкхонасида 2 килограмм 816 грамм гашиш борлиги аниқланиб, тегишли тартибда расмийлаштириб олинган.

ДХХ ходимлари томонидан вилоят ИИБ билан ҳамкорликда ўтказилган тезкор тадбирда эса Қўқон шаҳрида яшовчи, 33 ёшли фуқаро хонадонида 4 килограмм 831 грамм опий ва 995 грамм гашиш моддалари топилган.

Аниқланишича, ушбу гиёҳвандлик воситалари Қўқон шаҳрида яшовчи, 25 ёшли шахсга тегишли бўлиб, у Тожикистондан контрабанда йўли билан олиб келинган ва Тошкент шаҳрида сотиш режалаштирилган.

Ҳозирда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Мазвуга доир: Бекободда яшаётган Тожикистон фуқароси уйида 14,9 кило гашиш топилди (видео)