Маълумки Ўзбекистон Президенти Шавкат Мирзиёев Франция президенти Эммануэль Макроннинг таклифига биноан ушбу мамлакатга амалга оширган расмий ташрифи доирасида 22 ноябрь куни Париждаги Бурбон саройида ҳам бўлди. Бу ерда президент Франция Миллий йиғини раиси Яел Браун-Пиве билан учрашув ўтказган ҳамда унинг якунида ассамблея кутубхонасидаги Фахрий меҳмонлар китобида қайд ёзиб қолдирган эди.
«Дарё» фотомухбири мазкур қадимий бино ва кутубхонанинг эътиборга молик жиҳатларини кадрларга муҳрлади.
Бурбон саройи (Palais Bourbon) — Парижнинг сарой мажмуаларидан бири саналиб, Сена дарёсининг чап томонида, Орсе қирғоғи бўйида жойлашган. Унинг ташқи томонини оқ монументал колонналар ҳамда мамлакат байроғи безаб туради. Бино 1722—1728 йилларда Лоренцо Жардини лойиҳаси асосида қурилган. У қирол Людовик ХИВнинг суюкли қонуний қизи, маркиза де Монтеспан-герцогиня Луиза-Француаза Бурбон учун аталган. Асосий кириш дарвозаси гвардиячилар томонидан қўриқланадиган сарой кейинчалик олий даражадаги қатламлардан авлоддан авлодга ўтиб, ниҳоят Франция Миллий ассамблеяси мажлисларининг қароргоҳига айланган. Айни вақтдаги қиёфасига у 1804-1807 йилларда эга бўлган. 19—20-асрларда саройнинг интерьери қайта ишланган, айвон тепасида ҳайкалтарош Корто томонидан ясалган педимент, шунингдек, бино қанотларида Рюдо ва Прадиер томонидан яратилган аллегорик барельефлар қўшилган.
Саройда жойлашган Франция миллий ассамблеясининг қадимий кутубхонаси Эжен Делакруа томонидан чизилган шифт нақшлари ва расмлар билан безатилган. 5 та гумбаз ва 20 та деворий суратларда рассом илм-фан, фалсафа, қонунчилик, дин ва шеърият дунёсини тасвирлаган.
Бу ерда Жан-дъарк судининг асл материаллари, Жан-Жак Руссо қўлёзмалари, ацтекларнинг астрономик «Борбоникус кодекси», шунингдек, таниқли француз рассоми Оноре Доменинг «Ўрта синф машҳурлари» теракота бюстлари тўплами каби қимматли буюмлар мавжуд.
Изоҳ (0)