Тошкентда ҳаракатланиб кетаётган экспресс автобусда ёнғин содир бўлди

Тошкент шаҳри Мирзо Улуғбек туманида 26 ноябрь куни экспресс автобусда ёнғин чиққани акс этган фотолар эълон қилинганди. Фавқулодда вазиятлар вазирлиги ҳолат юзасидан маълумот берди.

Унга кўра, 26 ноябрь куни соат 15:02 да Мирзо Улуғбек тумани Мирзо Улуғбек кўчасида экспресс йўналишида Машинасозлар бекатига ҳаракатланиб кетаётган Mercedes-Benz автобусида ёнғин юзага келгани тўғрисида шаҳар ФВБга хабар келиб тушган.

Зудлик билан 2 та ёнғин-қутқарув экипажи воқеа жойига етиб борган вақтда ёнғин ҳайдовчи томонидан бирламчи ёнғин ўчириш воситалари орқали бартараф этилгани маълум бўлган. Ёнғин сабаб автобуснинг мотор қисми ёниб зарарланган.

Ҳодиса оқибатида тан жароҳати олган ва ҳалок бўлганлар йўқ. Ҳозирда ёнғин сабаби ва моддий зарар миқдори аниқланмоқда.

Маълумот учун, 23 ноябрдан ТТЗ — Машинасозлар метроси янги экспресс автобус йўналиши ҳаракатланишни бошлади. Ушбу йўналишда автобус фақат 4 та — ТТЗ бозори, Буюк ипак йўли метроси, Шифокорлар малакасини ошириш институти, Ашхобод боғи бекатларида тўхтайди ва Машинасозлар метросигача ҳаракатланади.

Йўл ҳақи 2 500 сўмни ташкил этиб, йўловчиларга 5 та Mercedes-Benz 5 автобуси хизмат кўрсатади.

Мавзуга доир: Тошкентда йўлга қўйилган экспресс автобусларнинг томи бўялмаганига изоҳ берилди