Toshkentda yo‘lga qo‘yilgan ekspress avtobuslarning tomi bo‘yalmaganiga izoh berildi

Poytaxt ko‘chalarida 23-noyabrdan harakatlana boshlagan E-1-sonli ekspress avtobuslarning tom qismi bo‘yalmagani aks etgan suratlar ijtimoiy tarmoqlarda muhokama qilindi. “Toshshahartransxizmat” AJ axborot xizmati holat yuzasidan ma’lumot berdi.

Ta’kidlanishicha, ushbu ekspress avtobus yo‘nalishi prezidentining “Toshkent shahar jamoat transporti tizimini yanada rivojlantirishga doir qo‘shimcha chora-tadbirlar to‘g‘risida”gi qaroriga asosan tashkil etilgan. Jamiyatning “5-Avtobus saroyi” filiali tasarrufidagi Mercedes-Benz LF rusumli avtobuslarning 5 donasi ushbu yo‘nalishda xizmat ko‘rsatish uchun biriktirilgan.

Yo‘lovchilar mazkur ekspress avtobus yo‘nalishini poytaxtdagi odatiy avtobus yo‘nalishlaridan ajratib olishlarini ta’minlash maqsadida ekspress avtobuslarning tashqi qismi ko‘k rangga bo‘yalgan, shuningdek, avtobusning ustki (tepasi) va ichki qismlariga bo‘yoq berishga talab yo‘qligi sababli bo‘yoqlash ishlari amalga oshirilmagan.

Ma’lumot uchun, 23-noyabrdan TTZ — Mashinasozlar metrosi yangi ekspress avtobus yo‘nalishi harakatlanishni boshladi. Ushbu yo‘nalishda avtobus faqat 4 ta — TTZ bozori, Buyuk ipak yo‘li metrosi, Shifokorlar malakasini oshirish instituti, Ashxobod bog‘i bekatlarida to‘xtaydi va Mashinasozlar metrosigacha harakatlanadi.

Yo‘l haqi 2 500 so‘mni tashkil etib, yo‘lovchilarga 5 ta Mercedes-Benz 5 avtobusi xizmat ko‘rsatadi.