НАТО бош котиби Йенс Столтенберг қишнинг бошланиши Украина учун «даҳшатли» бўлади, деган фикрда. Унинг сўзларига кўра, 29—30 ноябрь кунлари Бухарестда бўлиб ўтадиган йиғилишда альянсга аъзо давлатлар ташқи ишлар вазирлари Киевга қишки кийим-кечак, ёнилғи ва дори-дармонлардан иборат ёрдамни ошириш бўйича қарор қабул қилади. Бундан ташқари Столтенберг, Украина учун НАТО эшиклари очиқлигини таъкидлади.
«Шафқатсизлик, шаҳарлар ва фуқаролик инфратузилмаларига ракета ҳужумлари кучаймоқда, бу эса украиналикларни иссиқлик, ёруғлик ва озиқ-овқатдан маҳрум қилмоқда. Бу Украина учун қишнинг даҳшатли бошланиши», — деди альянс бош котиби Бухарестдаги учрашув олдидан бўлиб ўтган матбуот анжуманида.
Столтенбергнинг сўларига кўра, можарони тинч йўл билан ҳал қилиш имкониятларини оширишнинг энг яхши йўли Украинага ёрдам кўрсатишдир. У Бухарестдаги учрашувда ташқи ишлар вазирларининг гуманитар ёрдам етказишни оширишга келишиб олишини кутмоқда.
Украинанинг НАТОга қўшилиш имконияти ҳақидаги саволга жавобан бош котиб сўнгги йилларда альянс Черногория ва Шимолий Македонияни қабул қилганини, 2022 йилда эса Финляндия ва Швеция НАТОга таклиф қилинганини эслатди. «Бу қарорлар билан биз НАТО эшиклари очиқлигини ва Россия НАТОнинг кенгайиши бўйича вето ҳуқуқига эга эмаслигини кўрсатдик. Бу хабар Украинага ҳам тааллуқли», — таъкидлади Столтенберг.
Бош котиб, шунингдек, альянс аъзолари Швеция ва Финляндиянинг унга киришини тез орада ратификация қилишига ишонч билдирди.
Украина президенти Владимир Зеленский Россиянинг ракета зарбаларидан кейин деярли барча ҳудудларда электр таъминотида жиддий муаммолар сақланиб қолаётганини, 15 та вилоятда эса сув таъминотида узилишлар мавжудлигини айтди.
21 ноябрь куни Зеленский яна бир бор Ғарб давлатларини Киевнинг НАТО ва Европа Иттифоқига қўшилиш ташаббусини қўллаб-қувватлашга чақирди. Сентябрь ойида Столтенберг НАТОга аъзо бўлиш учун ариза ташкилотнинг барча аъзолари томонидан қўллаб-қувватланиши кераклигини таъкидлаганди.
6 октябрь куни Европа Иттифоқининг ички бозор бўйича комиссари Тьерри Бретон Украина ҳудудида ҳарбий ҳаракатлар давом этаётган вақтда мамлакат НАТОга қўшила олмаслигини айтди. Альянс қоидаларига кўра, ҳудудий низолар ҳал этилмаган давлатни ҳарбий блокка қабул қилиш мумкин эмас.
Изоҳ (0)