Украинадаги тўққиз ойлик урушдан сўнг мамлакат давлатчилиги ва ўзига хослиги ҳар қачонгидан кучайди. Россия эса, аксинча, чегаралари назоратсиз, хусусий ҳарбий тузилмаларга таянган ва аҳолиси қочқин муваффақиятсиз давлатга айланиб бормоқда — булар мамлакатдаги вазиятни назорат қилиб бўлмайдиган ҳолга солади, деб ёзмоқда The Economist журнали сиёсий мутахассисларга таяниб.
Ғарб етакчиларининг Украина Россия агрессиясига қарши тура олишига ишончи ортди, бироқ айни пайтда Россиянинг урушдан омон қолиши бўйича хавотир кучаймоқда, деб ёзган The Economist муҳаррири Аркадий Островский мақолада.
Журналда келтирилган муваффақиятсиз давлатнинг биринчи белгиси — аниқ чегараларнинг йўқлиги. 2022 йилнинг сентябрь ойида Украинанинг тўрт вилояти аннексия қилиниши Россияни чегаралари ноаниқ ва назоратсиз давлатга айлантира бошлади, дейилади The Economist мақоласида. Бу Россия ҳукумати ўз вазифаларини тўлиқ бажара олмаётганидан далолат бериши мумкин, деб ҳисоблайди сиёсатшунос Екатерина Шулман.
«Билишимизча, Россия Федерацияси ўзини ўзи йўқ қилмоқда ва муваффақиятсиз давлат босқичига ўтмоқда», — дея Шулманнинг сўзларини келтиради The Economist. Сиёсатшунос, шунингдек, Украина вилоятларининг аннексия қилиниши мамлакат ичидаги «муаммоли ҳудудлар», жумладан, Шимолий Кавказ республикаларига қўл келиши мумкинлигини айтди, деб ёзади газета. Шулман, агар Москва ҳукумати «бўш қўйиб берса» ушбу ҳудудларнинг баъзилари Россия таркибидан чиқишга уриниши мумкинлигини айтди.
The Economist нашрининг ёзишича, муваффақиятсиз давлатга хос яна бир белги — жисмоний кучлар устидан давлат монополиясининг йўқолиши ва сафарбарликка чақирув. «Вагнер» хусусий ҳарбий компанияси ва Чеченистон раҳбари Рамзан Қодиров назорати остидаги кучларнинг ҳаракатлари шундан далолат беради. Журналнинг таъкидлашича, ҳатто Россия давлат хавфсизлик идоралари ҳам ўз манфаатлари учун ишламоқда.
Бундан ташқари, Кремль энди мамлакат аҳолиси хавфсизлигининг кафолати бўла олмайди, сафарбарлик эълон қилиш орқали ҳатто унинг ўзи асосий хавф манбайига айланмоқда, дейилган The Economist мақоласида.
Путин ўз махсус ҳарбий операциясини уйига кўчирди ва одамларнинг тинчликда қолиш эвазига урушга қарши норозилик билдирмаслиги бўйича консенсусни бузди. Энди одамларга унинг режими учун курашиш ва ўлиш кераклиги айтилмоқда.Мақола муаллифининг қўшимча қилишича, сафарбарлик мамлакат ичида урушдан кўра кўпроқ ағдар-тунтарни келтириб чиқарди, бу эса иммиграциянинг янги тўлқини ва ижтимоий кескинликнинг кучайишига олиб келди.
Октябрь ойида The Economist нашри Россия сиёсий ва бизнес элитаси вакиллари мамлакатни Путинсиз янада ривожлантириш сценарийларини кўриб чиқа бошлагани ҳақида хабар берганди. Ўшанда нашр ҳарбий мағлубиятлар Россияни жиддий нотинчлик ва муваффақиятсизликка олиб бораётгани ҳақида ёзган.
Изоҳ (1)
Фейк.