Елисей саройида 22 ноябрь куни ўтган олий даражадаги музокаралардан сўнг Шавкат Мирзиёев ва Франция президенти Эммануэль Макрон рафиқалари билан Париждаги Лувр музейида бўлгани ҳақида хабар берилганди. Саида Мирзиёева ўзининг Telegram каналида музейда «Ўзбекистон воҳаларининг мўъжизалари. Карвон йўллари чорраҳасида» кўргазмаси очилишига бағишланган видеолавҳа эълон қилди.
Ушбу ёрқин воқеага юртимиз тарихига муҳаббат билан бир неча йил астойдил тайёргарлик кўрилди. Кўргазма Европа жамоатчилигида катта қизиқиш уйғотмоқда. Биз дунёга очиляпмиз, Ўзбекистон глобал маданиятга тобора сингиб, одамларга янада яқин ва тушунарли бўлмоқда, — деб ёзади Президент администрацияси Ижро этувчи аппаратининг коммуникациялар ва ахборот сиёсати бўйича шўъба мудири.
Ўзбек халқининг бой маданий меросига бағишланган «Ўзбекистон воҳаларининг мўъжизалари. Карвон йўллари чорраҳасида» кўргазмаси президентнинг 2018 йил октябрь ойида Францияга амалга оширилган ташрифи давомида эришилган келишувларга мувофиқ ташкил этилган. Давлат раҳбари ўшанда Ўзбекистон ва Франция музейлари ҳамкорлигида кўргазмалар ташкил этиш, мамлакатлар ўртасида илмий ва маданий алоқаларни кенгайтириш зарурлигини қайд этган эди. Ўзбекистон Маданият ва санъатни ривожлантириш жамғармаси ва Лувр музейи ўртасида тегишли меморандум имзоланган.
Кейинги уч йил давомида кўргазмаларга пухта тайёргарлик кўрилди. Бир нечта Ўзбекистон ва Франциянинг биргаликдаги экспедициялари уюштирилиб, кўплаб археологик топилмалар кашф қилинди. Бундан ташқари, Лувр реставрациячилари ва ўзбекистонлик мутахассислар бир нечта босқичдан иборат кенг кўламли тиклаш тадбирларини амалга оширди.
Бу ишлар натижасида Луврнинг Ришеле зали ва Ислом бўлимида хронологик кетма-кетликда жойлаштирилган бешта бўлимдан иборат катта кўргазма макони яратилди. Булар:
- «Воҳа давлатлари ва подшоҳликлари даври: Ипак йўлидаги маданиятларнинг мулоқоти»;
- «Ўрта асрлар ва санъатнинг гуллаб-яшнаши»;
- «Марказий Осиёда исломнинг тарқалиши, маданият ва фанда Уйғониш даври»;
- «Ибн Синодан Чингизхонгача»;
- «Буюк империялар даври: Темурийлар ва Шайбонийлар».
Луврдаги кўргазма нафақат Ўзбекистон ва Франция халқлари, балки бутун Европа ва Марказий Осиё ўртасидаги азалий тарихий алоқаларни, дўстлик ва ўзаро англашувни янада мустаҳкамлашга хизмат қилиши алоҳида қайд этилди. Кўргазма 2023 йил 6 март кунига қадар давом этади.
Изоҳ (0)