Коллектив хавфсизлик шартномаси ташкилоти (КХШТ) Тожикистон ва Қирғизистонга чегарадаги можарони ҳал қилишда ёрдам беришга тайёрлигини маълум қилди. Бу ҳақда «Белта» хабар берди.
Мазкур таклиф КХШТ бош котиби Станислав Зас томонидан Ереванда бўлиб ўтаётган ташкилот мажлисида айтилди. Арманистонда КХШТга аъзо давлатлар Ташқи ишлар вазирлари, Мудофаа вазирлари кенгаши ва Хавфсизлик кенгаши котиблари қўмитасининг қўшма мажлиси бўлиб ўтмоқда.
«Биз Марказий Осиё минтақасида Тожикистон–Қирғизистон чегарасидаги вазиятни янада нормаллаштиришга алоҳида эътибор қаратамиз. Ўйлайманки, КХШТ бу мақсадга эришишда икки давлатга ёрдам бериш учун зарур ресурслар ва тажрибага эга. Албатта, агар Тожикистон ва Қирғизистон буни зарур деб ҳисобласа», — деди КХШТ бош котиби.
Сентябрь ойида КХШТ Қирғизистон—Тожикистон чегарасида куч ишлатишни номақбул деб ҳисоблашини эълон қилган. Ташкилот икки мамлакат ўртасида муросага эришиш учун воситачи сифатида ҳаракат қилишга тайёрлигини билдирган.
Бундан ташқари, КХШТ 14—17 сентябрь кунлари қирғиз—тожик чегарасидаги тўқнашувлар оқибатида ҳалок бўлганларга оид хабарларни «оғриқ ва алам билан» қабул қилганини билдирган. «Икки қардош мамлакат халқлари бошига тушган фожиа муносабати билан уларга чуқур ҳамдардлик билдирамиз», — дея таъкидланади мурожаатда.
Октябрь ойига келиб, Қирғизистон мудофаа вазири Тожикистон билан чегарага КХШТ қўшинларини жойлаштиришни таклиф қилганди. Мамлакат Мудофаа вазири сўзларига кўра, баҳсли ҳудудлар бўйича Душанбе билан муросага келиш анча қийин бўлади, чунки томонларнинг ҳар бири «ўз ҳақиқатига эга».
Изоҳ (0)