Қозоғистон Ташқи ишлар вазирлиги Европада Хавфсизлик ва ҳамкорлик ташкилоти (ЕХҲТ) Демократик институтлар ва инсон ҳуқуқлари бюроси (ДИИҲБ)нинг республикадаги президентлик сайловларини кузатиш бўйича миссияси хулосаларини хато ва нохолис, деб атади.
ТИВ пресс-релизида қайд этилишича, кузатувчиларнинг баёноти ташкилотнинг муҳим институти сифатида Қозоғистон томонидан ҳозиргача қўллаб-қувватланган ДИИҲБнинг самарадорлигини шубҳа остига қўяди.
Вазирлик миссия ҳисоботида «ЕХҲТ/ДИИҲБга хос бўлган бир қатор стереотипли ва нохолис хулосалар»ни, шунингдек, Қозоғистондаги «ички вазият ривожини идрок этишни мутлақо истамаслик» омилларини аниқлаган.
ЕХҲТ/ДИИҲБ кузатувчилар гуруҳи ва унинг раҳбарияти фаолиятида Қозоғистон президенти томонидан мамлакатни ўзгартириш, уни қонун устуворлигига асосланган илғор жамиятга айлантиришга қаратилган ислоҳотларга ишончсизлик яққол намоён бўлди, — деб таъкидлади ТИВ.Вазирлик миссия баёноти сайловни кузатган барча нуфузли халқаро ташкилотлар миссиялари хулосаларига мос келмаслигини, бу эса унинг нохолислигини яна бир бор исботлашини қўшимча қилди.
ДИИҲБ/ЭХҲТ баёноти ўз мазмунига кўра, Қозоғистон расмийлари билан узоқ муддатли ва конструктив ҳамкорликни ривожлантириш истаги йўқлигидан далолат беради, бу шубҳасиз эътиборга олинади, — дея хулоса қилди вазирлик.ЕХҲТ баёнотида нима дейилган?
21 ноябрь куни ЕХҲТ кузатувчилари миссияси Қозоғистонда аввалроқ бўлиб ўтган президент сайловларида рақобат бўлмагани ҳақида хабар берди. Миссия вакиллари овозларни санаб чиқиш пайтидаги қонунбузарликларга ҳам эътибор қаратди, республикада сўз эркинлиги ва тинч йиғилишлар ўтказиш имконияти чеклангани ҳақида гапирди.
20 ноябрь куни Қозоғистон республикасида бўлиб ўтган навбатдан ташқари президентлик сайловлари рақобатсиз сиёсий муҳитда ўтди ва самарали тайёргарлик кўрилганига қарамай, сайловлар тегишли қонунчиликни ЕХҲТнинг чинакам плюрализмни таъминлаш бўйича мажбуриятларига мувофиқлаштириш бўйича кейинги ислоҳотлар зарурлигини намоён қилди. Сайловда амалдаги президент парламентнинг барча партияларидан қўшма номзод сифатида қатнашди ва осойишта ўтган сайлов кампаниясида унга жиддий эътироз билдирилмади, — дейилади баёнотда.20 ноябрь куни Қозоғистонда муддатидан олдин президентлик сайловлари бўлиб ўтди. Уларда республика сайлов ҳуқуқига эга фуқароларнинг 69,44 фоизи ёки 8 миллиондан ортиқ киши иштирок этди. Олий давлат лавозими учун олти нафар номзод кураш олиб борди. Республика Марказий сайлов комиссияси овоз беришнинг дастлабки натижаларини эълон қилди — унга кўра, амалдаги президент Қосим-Жўмарт Тўқаев 81,31 фоиз овоз билан ғалаба қозонган.
Изоҳ (0)