Qozog‘iston Tashqi ishlar vazirligi Yevropada Xavfsizlik va hamkorlik tashkiloti (YXHT) Demokratik institutlar va inson huquqlari byurosi (DIIHB)ning respublikadagi prezidentlik saylovlarini kuzatish bo‘yicha missiyasi xulosalarini xato va noxolis, deb atadi.
TIV press-relizida qayd etilishicha, kuzatuvchilarning bayonoti tashkilotning muhim instituti sifatida Qozog‘iston tomonidan hozirgacha qo‘llab-quvvatlangan DIIHBning samaradorligini shubha ostiga qo‘yadi.
Vazirlik missiya hisobotida “YXHT/DIIHBga xos bo‘lgan bir qator stereotipli va noxolis xulosalar”ni, shuningdek, Qozog‘istondagi “ichki vaziyat rivojini idrok etishni mutlaqo istamaslik” omillarini aniqlagan.
YXHT/DIIHB kuzatuvchilar guruhi va uning rahbariyati faoliyatida Qozog‘iston prezidenti tomonidan mamlakatni o‘zgartirish, uni qonun ustuvorligiga asoslangan ilg‘or jamiyatga aylantirishga qaratilgan islohotlarga ishonchsizlik yaqqol namoyon bo‘ldi, — deb ta’kidladi TIV.Vazirlik missiya bayonoti saylovni kuzatgan barcha nufuzli xalqaro tashkilotlar missiyalari xulosalariga mos kelmasligini, bu esa uning noxolisligini yana bir bor isbotlashini qo‘shimcha qildi.
DIIHB/EXHT bayonoti o‘z mazmuniga ko‘ra, Qozog‘iston rasmiylari bilan uzoq muddatli va konstruktiv hamkorlikni rivojlantirish istagi yo‘qligidan dalolat beradi, bu shubhasiz e’tiborga olinadi, — deya xulosa qildi vazirlik.YXHT bayonotida nima deyilgan?
21-noyabr kuni YXHT kuzatuvchilari missiyasi Qozog‘istonda avvalroq bo‘lib o‘tgan prezident saylovlarida raqobat bo‘lmagani haqida xabar berdi. Missiya vakillari ovozlarni sanab chiqish paytidagi qonunbuzarliklarga ham e’tibor qaratdi, respublikada so‘z erkinligi va tinch yig‘ilishlar o‘tkazish imkoniyati cheklangani haqida gapirdi.
20-noyabr kuni Qozog‘iston respublikasida bo‘lib o‘tgan navbatdan tashqari prezidentlik saylovlari raqobatsiz siyosiy muhitda o‘tdi va samarali tayyorgarlik ko‘rilganiga qaramay, saylovlar tegishli qonunchilikni YXHTning chinakam plyuralizmni ta’minlash bo‘yicha majburiyatlariga muvofiqlashtirish bo‘yicha keyingi islohotlar zarurligini namoyon qildi. Saylovda amaldagi prezident parlamentning barcha partiyalaridan qo‘shma nomzod sifatida qatnashdi va osoyishta o‘tgan saylov kampaniyasida unga jiddiy e’tiroz bildirilmadi, — deyiladi bayonotda.20-noyabr kuni Qozog‘istonda muddatidan oldin prezidentlik saylovlari bo‘lib o‘tdi. Ularda respublika saylov huquqiga ega fuqarolarning 69,44 foizi yoki 8 milliondan ortiq kishi ishtirok etdi. Oliy davlat lavozimi uchun olti nafar nomzod kurash olib bordi. Respublika Markaziy saylov komissiyasi ovoz berishning dastlabki natijalarini e’lon qildi — unga ko‘ra, amaldagi prezident Qosim-Jo‘mart To‘qayev 81,31 foiz ovoz bilan g‘alaba qozongan.
Izoh (0)