Германия Польша билан унинг ҳаво ҳудудида патруллик қилиш ҳақида келишиб олди. Бу ҳақда Германия мудофаа вазири Кристина Ламбрехт польшалик ҳамкасби Мариуш Блашчак билан музокаралардан кейин маълум қилди, деб ёзади «РБК».
Унинг айтишича, Германия Польшага Patriot ракета мажмуаларини юборади, Польша ҳаво ҳудуди хавфсизлигини таъминлаш учун эса Eurofighter қирувчилари жалб этилади.
Ламбрехт Польшани Германиянинг дўсти ва иттифоқчиси деб атади ҳамда бу мамлакат Украинанинг қўшниси сифатида «унчалик қаттиқ ҳимояланмагани»ни айтди.
15 ноябрь куни Польша ОАВлари Украина билан чегара яқинидаги Люблинск вилоятининг Пшеводув қишлоғига иккита ракета қулагани ҳақида хабар берди. Ракеталардан бири элеваторга келиб тушди, оқибатда икки киши ҳалок бўлди. Шу куни Россия Украина ҳудудига ёппасига ракета зарбаси берганди.
Украина ҳукумати Польшадаги ҳодисада Россияни жавобгар қилди. Москва айбловларни рад этмоқда. Ғарб мамлакатлари ва Польша ҳукумати ракета Украинага тегишли бўлгани ҳақидаги версияга мойиллик билдирмоқда. Польша президенти Анжей Дуда «бахтсиз ҳодиса» юз берганини тахмин қилди. Унинг сўзларига кўра, катта эҳтимол билан, қулаган ракета Украина ҳаво ҳужумига қарши мудофааси томонидан қўлланилган.
АҚШ, Германия ва Буюк Британия ҳам Польша ракета қулаши билан боғлиқ ҳодиса учун якунда Украина билан уруш бошлаган ва мамлакат фуқаролик инфратузилмасини ўққа тутган Россия масъул эканлиги ҳақидаги баёнотлар билан чиқди.
Шундан кейин Ламбрехт Украина ракетасининг Польшага қулаши Европа ҳаво ҳужумидан мудофаа тизимидаги камчиликларни очиб берганини айтган ва НАТО ҳаво ҳужумидан мудофаа тизимини такомиллаштиришга чақирган эди.
Изоҳ (0)