Туркия армияси ўзининг Сурия ва Ироқдаги «Чангал-Қилич» операцияси доирасида Анқара томонидан террорчилик ташкилотлари деб тан олинган Курдистон ишчилар партияси ва «Халқ мудофааси отрядлари»нинг 184 нафар аъзосини йўқ қилди. Операция натижалари ҳақида мудофаа вазири Хулуси Акар маълум қилди, деб ёзади «Коммерсантъ».
«‘Чангал-Қилич’ операцияси бошидан буён 184 нафар террорчи ерусти ўт очиш воситалари ва авиация ёрдамида зарарсизлантирилди», — деди Акар Қуруқлик қўшинлари қўмондонлиги тезкор штабида. Унинг сўзларига кўра, операциянинг биринчи босқичида 89 та объект, шу жумладан, бошпаналар, бункерлар, ғорлар, туннеллар ва омборлар йўқ қилинган.
Вазирнинг айтишича, Анқара тинч аҳолига, атроф-муҳитга, тарихий, маданий ва диний иншоотларга зарар етишининг олдини олиш учун «алоҳида кўнгилчанлик кўрсатмоқда». Суриядаги курдлар аввалроқ Туркиянинг ҳужуми оқибатида оддий фуқаролар ва суриялик ҳарбийлар ҳалок бўлганини маълум қилганди.
Туркия президенти Ражаб Тоййиб Эрдўғон эса Туркия томонидан Сурия ва Ироққа берилган зарбалар учун жавобгарликни Россия зиммасига юклаган, у ўз бўйнига олган мажбуриятларни бажармаётганини айтганди. Ғарблик шерикларни эса Эрдўғон Туркияда хавфсизлик соҳасидаги вазиятни беқарорлаштиришда айблади.
Изоҳ (0)