Қосим-Жўмарт Тўқаевнинг тантанали равишда ўз лавозимига киришиш маросими 26 ноябрь куни бўлиб ўтади. Бу ҳақда Марказий сайлов комиссияси йиғилишида маълум қилинди, деб ёзади Tengrinews.
«Марказий сайлов комиссияси Қосим-Жўмарт Тўқаевни Қозоғистон Республикасининг сайланган президенти сифатида рўйхатга олди. Сайланган президент томонидан қасамёд қабул қилиш санаси 26 ноябрь деб белгиланди», — деди МСК раиси Нурлан Абдиров.
МСК мажлисида Қозоғистонда 20 ноябрь куни бўлиб ўтган президент сайловининг якуний натижалари ҳам эълон қилинди. Сайловчиларнинг 69,44 фоизи, яъни 8 300 046 киши овоз берган бўлиб, шуларнинг 6 456 492 нафари ёки 81,31 фоизи Қосим-Жўмарт Тўқаевни сайлаган.
Бош вазир ўринбосари — молия вазири Ерулан Жамаубаев президент инаугурациясига қўшимча маблағлар ажратилмаслигини маълум қилди.
«Президент инаугурациясига қўшимча равишда молиявий маблағлар бюджетидан ажратилмайди. Президент томонидан қасамёд қабул қилиниши катта маблағ талаб этади, деб ўйламайман. Шунинг учун биз томонимиздан ҳеч қандай қўшимча маблағлар ажратилмайди», — деди Жамаубаев журналистларнинг саволларига жавобан.
Изоҳ (0)