Аксарият аёллар тональ кремсиз ёки лаб бўёғисиз яшаши мумкин, лекин улар ҳаётни тушсиз тасаввур қила олмайди. Кўп йиллардан бери тушни қўллаш техникаси тўлиқ ўзлаштирилган, деб ўйлаш мумкин. Аммо ундай эмас. Киприклар ҳар доим мукаммал кўриниши учун туш қўллашда қуйидаги хатолардан қочишга ҳаракат қилиш лозим, деб ёзади Marie Claire.
Битта тушдан кўпчиликнинг фойдаланиши
Синглимиз ёки дугонамизнинг лаб бўёғини синаб кўришимиз мумкин, лекин туш бир инсонгина фойдаланиши керак бўлган нарсадир. Чунки туш чўткаси киприклардаги бактерияларга тўла бўлиб, улар юқоридаги ҳолатда бегона бактериялар билан аралашиб кетади. Афсуски, бу кўз инфекцияси ва яллиғланишига олиб келиши мумкин.
Тушни жуда кўп миқдорда суртиш
Туш чўткаси талаб қилинганидан кўпроқ маҳсулотни оладиган тарзда ишлаб чиқилган. Бу киприкларнинг бир-бирига ёпишиб кетишига сабаб бўлади ва қўллашдан кейинги натижа хурсанд қилмайди. Тушни киприкларга суртишдан олдин чўткани салфетка билан артиб, оптимал узунлик ва ҳажмга эришиш мумкин.
Нотўғри қўллаш
Агар туш қўллашда махсус қоидалар мавжуд эмас, деб ўйласангиз, хато қиласиз. Тушни тўғри суртиш техникасига кўра, кирпиклар тагидан уларнинг учларигача бўлган жойни эҳтиёткорлик билан тараш керак. Бу ҳаракат киприкнинг керакли ҳажм ва узунлигини таъминлайди.
Туш суртгандан кейин киприкларни қайириш
Туш суртилган киприкларни қайириш орқали улар катта стрессга дучор бўлади. Бу киприкларнинг ёпишиб қолишига ва тўкилишига олиб келиши мумкин. Бундан ташқари, кўзга тен, қалам ёки бошқа бўёқлар суртилган бўлса, уларга ҳам путур етиши мумкин. Шунинг учун макияждан аввал киприкларни керакли кўринишда қайириб олиш тавсия этилади.
Сув ўтказмайдиган тушдан ҳар куни фойдаланиш
Аёлларнинг энг кўп учрайдиган хатоларидан бири кундалик равишда сув ўтказмайдиган туш ишлатишидир. Сув ўтказмайдиган туш узоқ вақт давомида туради, лекин уни фақат сув тегиш эҳтимоли мавжуд кунларда суртиш керак. Бу тўй ёки шунчаки зиёфат бўлиши мумкин, аммо қуруқ об-ҳавода офис учун уни қўлламаган яхшироқ. Ҳар куни сув ўтказмайдиган тушдан фойдаланиш киприкларни қуритиб, вақт ўтиши билан тўкилишга олиб келади.
Изоҳ (0)