Қозоғистонда навбатдан ташқари президент сайлови арафасида 19 ноябрь — жимжитлик куни деб эълон қилинган. Шу куни олиб борилган ҳар қандай ташвиқот фаолияти ноқонуний ҳисобланади, деб ёзади Tengrinews.
Марказий сайлов комиссияси раиси Нурлан Абидов маълум қилишича, 18 ноябрь куни сайловолди ташвиқотининг охирги куни бўлган.
«Сайловолди ташвиқоти сайловдан олдинги куни маҳаллий вақт билан 00:00 да тугайди. 19 ноябрь — жимжитлик куни. Сайловолди ташвиқоти билан боғлиқ ҳар қандай фаолият жимжитлик кунида тақиқланади ва унинг учун қонунчилик томонидан жавобгарлик кўзда тутилган», — деди Абдиров МСК мажлисида.
Қозоғистонда 20 ноябрь куни навбатдан ташқари президентлик сайлови ўтказилади. Қозоғистон президенти Қосим-Жўмарт Тўқаев шу йил кузда навбатдан ташқари президент сайловларини ўтказиш таклифини 1 сентябрь куни халққа йўллаган мурожаатида билдирганди. Президентлик мандатини етти йиллик битта муддат билан чеклашни ва қайта сайланишни тақиқлашни ҳам ўша мурожаатида таклиф қилганди.
20 ноябрь куни овоз бериш маҳаллий вақт билан 07:00 дан 20:00 гача бўлиб ўтади. Маъмурий-ҳудудий бирликлар бўйича овозларни ҳисоблаш натижалари ҳудудий сайлов комиссиялари томонидан амалга оширилади ва икки кун муддатда, яъни 22 ноябрга қадар Марказий сайлов комиссиясига етказилади.
21 октябрь куни 18:00 да сайловолди ташвиқоти бошланиб, 19 ноябрь 00:00 га қадар давом этди.
Изоҳ (0)