Human Rights Watch ташкилоти Туркия мунтазам равишда ўн минглаб афғон муҳожирларини мамлакатнинг Эрон билан чегарасидан чиқараётгани ёки уларни тўғридан-тўғри Афғонистонга қайтариб юбораётганини маълум қилди. Бу ҳақда Hasht-e Subh Daily хабар берди.
Ташкилот ҳисоботига кўра, Туркия «Толибон» Афғонистонни эгаллаб олганидан сўнг афғон муҳожирларини мамлакатдан ҳайдашни кучайтирган. Human Rights Watch Туркия бир қатор Афғонистон фуқароларининг Бирлашган Миллатлар Ташкилоти идорасида рўйхатдан ўтишларига тўсқинлик қилганини аниқлади.
«Туркия тез-тез депортация қилиниши кутилаётган афғон муҳожирларига бошпана сўраш имкониятини бермайди», дейилади ҳисоботда.
Туркия Ички ишлар вазирлигининг Иммиграция бошқармаси мамлакатга киришига тўсиқ қўйилган 238 минг 448 нафар ноқонуний муҳожирнинг аксарияти Афғонистон фуқаролари эканини маълум қилди. Туркия сўнгги саккиз ой ичида Кобулга 44 768 нафар афғон қочқинини самолётда жўнатгани, бу Human Rights Watch маълумотларига кўра, 2021 йилга нисбатан 150 фоизга кўплиги қайд этилди.
Ташкилот муҳожирларни сиқиб чиқариш Инсон ҳуқуқлари бўйича Европа конвенцияси, Фуқаролик ва сиёсий ҳуқуқлар тўғрисидаги халқаро пакт ва 1951 йилдаги Қочқинлар тўғрисидаги конвенция билан тақиқланишини билдирди.
Аввалроқ БМТ Тожикистон ҳукуматини афғонларни депортация қилишни тўхтатишга чақирганди. Ташкилот қочқинларнинг мажбурий қайтарилиши қонунга ва қочқинлар бўйича халқаро ҳуқуқнинг асосий тамойилига зид эканини эслатди.
Изоҳ (0)