Перу аэропортида самолёт ўт ўчириш машинаси билан тўқнашиб кетди, 2 киши ҳалок бўлди (видео)

Перу пойтахти Лимада Хорхе Чавес номидаги аэропортда йўловчи самолёти учиш-қўниш йўлагида ўт ўчириш машинаси билан тўқнашиб, сўнг ёниб кетди. Машинада бўлган икки ўт ўчирувчи ҳалок бўлди. Бу ҳақда Лима Airпорт Partners компанияси хабар берди.

https://twitter.com/crlwaly/status/1593716456608235521

Баёнотда қурбонларнинг оилаларига ҳамдардлик билдирилиб, воқеа юзасидан текширувлар олиб борилаётгани айтилади.

Ҳодиса муносабати билан аэропорт 19 ноябрь 13:00 га қадар (Тошкент вақти билан 23:00) ўз фаолиятини тўхтатиб қўйди. У ерга қўниши керак бўлган рейслар бошқа аэропортларга йўналтирилади.

https://twitter.com/avsafeco/status/1593748939479597056

Авиация ёнғин хавфсизлиги хизмати автомобили билан ЛАТАМ Airlines Перу авиакомпаниясининг ЛА2213 рейси тўқнашиб кетган, у Лима — Хулиака йўналишида парвоз қилиши керак эди.

Авиакомпания йўловчилар ва экипаж аъзолари орасида жабрланганлар йўқлигини маълум қилди. Самолёт машина билан тўқнашиб кетганидан кейин орқа қисми ёниб турган ҳолатда яна бироз вақт ҳаракатланишда давом этган. Кейинроқ ёнғин ўчирилган.

https://twitter.com/FlightModeblog/status/1593747483569577984

Аэропорт жойлашган Каляо мухтор ҳудуди прокуратураси воқеа юзасидан текширув бошлади. Унинг маълумотларига кўра, ҳодисада яна бир киши жабрланган.