Европа Иттифоқи давлатларида газ нархи тушиб кетди — Bloomberg

Россиянинг Украинадаги урушининг тўққизинчи ойида Евроиттифоқда газ нархининг пасайиши кузатилмоқда. Бу ҳақда Bloomberg хабар бермоқда.

Шунингдек, Европа Иттифоқи мамлакатларида қулай ҳаво ҳарорати туфайли иситиш мавсуми кечиктириши ва газ нархига ижобий таъсир кўрсатиши таъкидланди.

Асосий фьючерслар нархи 17 ноябрь, пайшанба куни 10,2 фоизга тушганидан кейин яна 1,2 фоизга пасайди.

Ҳисоботда айтилишича, Европадаги газ омборлари деярли тўла — улар қишда буфер вазифасини бажариши керак.

Ўртача ҳарорат ва юқори LNG импорти сўнгги ҳафталарда етказиб бериш билан боғлиқ хавотирларни енгиллаштирди. Аммо агар совуқ кескин талабни оширса, захиралар тезда тугаши мумкин.

Баъзи таҳлилчилар, агар об-ҳаво яхши бўлса, Европа Россиянинг чекланган таъминоти билан биринчи қишдан ўтиши мумкинлигини тахмин қилмоқда.

Аммо ўзгарувчанлик сақланиб қолмоқда ва газ нархи сўнгги беш йилдаги ўртача кўрсаткичдан уч баравар ошган. Мутахассислар ва расмийлар аҳолини энергияни тежашга чақиришда давом этмоқда.

Шу билан бирга, ЕИ келаси ҳафта энергетика вазирларининг учрашуви олдидан газ нархининг кескин кўтарилишини чеклаш бўйича музокараларни давом эттирмоқда.

Аввалроқ Европа иситиш мавсуми учун ер ости омоборларидан газ олишни бошлагани ҳақида хабар берилганди.