McDonald’s Қозоғистондаги барча ресторанларини ёпади. Бу ҳақда компания 17 ноябрь куни ижтимоий тармоқ саҳифаларида маълум қилган, деб ёзади Forbes.
Тармоқ ресторанлари 18 ноябрь, жума куни ёпилади. Хабарда айтилишича, бу «маҳаллий етказиб беришдаги чекловлар туфайли» содир бўлмоқда.
McDonald’s’нинг Қозоғистон тармоғи мамлакатнинг олти шаҳрида — Остона, Олмаота, Атирау, Ақтўбе, Қўстанай, Қарағандада жойлашган 24 та ресторандан иборат. Тармоқда 2 мингга яқин киши ишлайди.
McDonald’s Қозоғистонда 2016 йилдан буён фаолият юритади. 2022 йил баҳори ҳолатига мамлакатнинг олтита шаҳрида 23 та ресторан очилган.
Forbes март ойида Россияда McDonald’s фаолияти тўхтатилганидан кейин Қозоғистондаги тармоқ муаммоларга учраши мумкинлиги, чунки маҳсулотларнинг ярмидан кўпини Қозоғистондаги ресторанлар россиялик етказиб берувчилардан олишини ёзган эди.
McDonald’s’нинг Қозоғистондаги франчайзиси ҳисобланган бизнесмен Кайрат Боранбаев март ойида йирик ўғирлик ҳақидаги иш бўйича ҳибсга олинган эди.
Боранбаев СПП компаниясига эгалик қилиб, у McDonald’s’нинг Россиядаги Свердлов, Оренбург, Челябинск, Курган, Тюмен ва Киров вилоятларидаги тармоқларини бошқарган.
Тадбиркор Беларусь ва Қозоғистондаги McDonald’s франшизасига эгалик қилади. Шунингдек, «КазРосГаз» собиқ бош директори сифатида ҳам таниқли. Аввалроқ «Коммерсантъ»нинг иккита манбаси ҳам Кайрат Боранбаевнинг тузилмалари McDonald’s хусусий объектларининг янги эгасига айланишини тахмин қилганди.
Кайрат Боранбаев Қозоғистоннинг энг бой бизнесменлари рўйхатига кирган. У мамлакат собиқ президенти Нурсултон Назарбоев оиласининг аъзосидир: унинг қизи Назарбоевнинг 2020 йилда вафот этган неварасига турмушга чиққан эди. 2022 йил баҳорида Боранбаев жиноий таъқибга учради — қишки норозиликлардан кейин Назарбоев атрофидаги бошқа бир қатор одамлар сингари. У ўғирлик ҳақидаги иш бўйича ҳибсга олинганди.
Изоҳ (0)