Сенат Қирғизистон билан чегарани делимитация қилиш тўғрисидаги шартномани ва Андижон сув омбори тўғрисидаги битимни ратификация қилиш ҳақидаги қонунларни маъқуллади. Бу ҳақда Сенат ахборот хизмати хабар берди.
Таъкидланишича, 18 ноябрь куни Олий Мажлис Сенатининг ўттиз бешинчи ялпи мажлисида сенаторлар Ўзбекистон ва Қирғизистон ўртасидаги муҳим икки томонлама шартномаларни ратификация қилиш тўғрисидаги қонунларни кўриб чиқди.
Муҳокамада тегишли вазирлик ва идоралар, шунингдек, Андижон, Фарғона ва Наманган вилоятлари ҳокимликлари раҳбарлари, халқ депутатлари маҳаллий кенгашлари депутатлари, экспертлар ҳам иштирок этди.
Ялпи мажлисда сенаторлар «Ўзбекистон Республикаси билан Қирғизистон Республикаси ўртасида ўзбек-қирғиз Давлат чегарасининг алоҳида участкалари тўғрисидаги Шартномани ратификация қилиш ҳақида»ги ҳамда «Ўзбекистон Республикаси Ҳукумати билан Қирғизистон Республикаси Вазирлар Маҳкамаси ўртасида Андижон (Кампиробод) сув омборининг сув ресурсларини биргаликда бошқариш тўғрисидаги Битимни ратификация қилиш ҳақида»ги Ўзбекистон Республикаси қонунларини батафсил муҳокама қилди.
Сенаторлар давлат чегараси билан боғлиқ низоли масалаларнинг ҳал этилиши мамлакат миллий хавфсизлигини таъминлашда муҳим аҳамият касб этишини таъкидлади, чунки бу чегарадаги низоларнинг олдини олиш ва ноқонуний савдога самарали қарши курашиш имконини беради. Ўз навбатида, Андижон (Кампиробод) сув омборидан биргаликда фойдаланиш минглаб фермер хўжаликларини сув билан узлуксиз таъминлашда ишончли кафолатлар яратади.
Бундан ташқари, мазкур ҳужжатларнинг қабул қилиниши трансчегаравий сув ресурсларидан оқилона ва ўзаро манфаатли фойдаланишга хизмат қилиши, икки томонлама ҳамкорликни сифат жиҳатидан янги босқичга олиб чиқишга имкон бериши таъкидланди. Батафсил муҳокама якунлари бўйича Сенат мазкур қонунларни маъқуллаш тўғрисида қарорлар қабул қилди.
Аввалроқ Қирғизистон парламенти Ўзбекистон билан чегара тўғрисидаги шартномани ҳамда Андижон сув омборидан фойдаланишга оид ҳужжатни ратификация қилгани ҳақида хабар берилган эди. Ҳужжатларни 64 нафар депутат қўллаб-қувватлаган, 19 нафари қарши овоз берган.
Ўзбекистон тарафидан эса депутатлар қабул қилган ҳужжатларни Сенат маъқуллаши, сўнг президент имзоласа, томонлар бир-бирини хабардор қилгач, шартномалар расман кучга кириши маълум қилинган.
Мавзуга доир:
- Абдулла Арипов Ўзбекистон ва Қирғизистоннинг баҳсли ер масалаларига аниқлик киритди
- «Бирор одам норози бўлмайди» – Абдулла Арипов Ўзбекистоннинг Қирғизистон билан чегара чизиғидан қанча хонадон кўчирилишини айтди
- «Қирғизистон ‘Ғовасой’ дарёсининг оқимига тўсқинлик қилмаслик ва сувини ифлослантирмаслик мажбуриятини олган» — Абдулла Арипов
Изоҳ (0)