«Билим учун 100 миллион», «Билимдон талаба» ва «Ёш китобхон» онлайн олимпиадаларининг ғолиблари тақдирланди. Бу ҳақда Ёшлар ишлари агентлиги директори Алишер Садуллаев хабар берди.
Қайд этилишича, «Билим учун 100 миллион» лойиҳасининг биринчи босқичи — онлайн шаклда ўтказилган турларда 246 991 нафар иштирокчи қатнашди. Апрель ойидан бугунга қадар энг юқори балл тўплаган 100 нафар иштирокчи ўртасида 17 ноябрь куни Тошкент шаҳарида финал ўтказилди. 1-ўринни қўлга киритган иштирокчи 100 млн сўм, қолган иштирокчиларнинг ҳар бири эса 1 млн сўмдан пул мукофотлари билан тақдирланди.
Шунингдек, Халқаро талабалар куни муносабати билан 12—13 ноябрь кунлари ўтказилган «Билимдон талаба» онлайн олимпиадасида энг юқори бални тўплаган 50 нафар талабанинг ҳар бири 1 млн сўмдан пул мукофоти билан тақдирланди.
Бундан ташқари, @kitobxontestbot орқали китобхон ёшлар ўртасида ўтказилаётган «Ёш китобхон» онлайн олимпиадасида энг юқори натижаларни қайд этаётган иштирокчилар ноутбук ва планшет билан тақдирланди. Айни пайтда ушбу лойиҳа яна давом этмоқда.
Изоҳ (0)