«Бу сафар нима бўлганини билмаймиз» — Зеленский Польша ҳудудига тушган ракеталар ҳақида

Украина президенти Владимир Зеленский 15 ноябрь куни Польша ҳудудига тушган ракета парчаларининг қайси томонга тегишли эканлиги ҳақида аниқ фикрни айтишнинг имкони йўқлигини таъкидлади, деб ёзади «РБК».

«Бу сафар нима бўлганини билмаймиз, ишончимиз комил эмас, менимча, дунё ҳам 100 фоизлик маълумотга эга эмас. Аммо аниқ биламанки, Россиянинг ракеталари ҳам бор эди, биз душманнинг ҳаво ҳужумига қарши мудофаа ракеталаридан фойдаланганмиз», — деди у ва Польшага қайси ракета тушганини айтиш учун тергов тугашини кутишга чақирди.

Аввалроқ Зеленский Польшага тушган ракеталар Россияга тегишли эканига тўла ишонишини айтган эди. Бироқ Польша ва АҚШ буни рад этди. Россия томонининг маълум қилишича, қулаган ракетанинг қолдиқлари «Украина ҳарбий ҳаво кучларининг С-300 ҳаво мудофаа тизимининг зенит ракетасининг элементлари» ҳисобланади.

Ракеталарнинг қулаши натижасида икки киши ҳалок бўлган. Ҳодиса жойи эса Польша—Украина чегараси яқинидаги Пржеводов қишлоғидир. Зеленскийнинг эслашича, бу ҳолат биринчиси эмас: октябрь ойи охирида Украина ҳаво мудофааси томонидан уриб туширилган ракета Молдовада қулаган.

15 ноябрь куни Польшанинг Украина билан чегарадош Пшеводов қишлоғига ракеталар қулаган, оқибатда 2 киши ҳалок бўлган эди. Бу воқеа Украина ҳудуди оммавий ракета зарбаларига учраган куни юз берди.

Дастлаб Associated Press агентлиги Америка разведкасидаги манбага таяниб, Польшага қулаган ракеталар Россияга тегишли бўлиши мумкинлиги ҳақида хабар берганди. Польша Ташқи ишлар вазирлиги ҳам уларнинг «Россияда ишлаб чиқарилган»ини тасдиқлаган. Шу билан бирга, Польша президенти Анжей Дуда Варшавада ракеталарни ким учиргани ҳақида маълумот йўқлигини таъкидлади.

Пентагон матбуот котиби Пет Райдер журналистларга ракеталарнинг кимга тегишли эканини ҳали тасдиқлай олмаслигини айтган. АҚШ президенти Жо Байден ҳам уларнинг Россиядан учирилгани ҳозирча рад этилаётгани ҳақида гапирди.

Кейинроқ АП 3 нафар америкалик расмийга таяниб, Польшада қулаган ракеталар Россия ракеталарини уриб тушириш учун Украина Қуролли кучлари томонидан отилган, деб хабар берди.

Ўз навбатида, Россия Мудофаа вазирлиги ҳам ракеталар Украина армиясига қарашли деб даъво қилмоқда.