Россия қўшинларининг Украинага кириши фонида мамлакат ҳукумати давлатни сақлаб қолиш ва ҳарбий хизматчиларнинг руҳини кўтариш мақсадида аҳолини эвакуация қилмади, деб тушунтирди Украина президенти Владимир Зеленский.
«Агар Украинада одамлар бўлмаганида, биз давлатимизни қўлдан берган бўлардик», — деди Зеленский.
Унинг айтишича, Киевга биринчи ракета ҳужумидан кейин шаҳарнинг барча аҳолисини эвакуация қилиш, дўконлар, инфратузилмани ёпиш ва электр энергиясини ўчириш таклифи ўртага ташланган. Зарбалар бутун мамлакат бўйлаб берила бошлаганда эса, у Украинанинг барча аҳолисини қаерга эвакуация қилиш мумкинлигини сўраган: «Хўш, қаерга? Польшагами? Словакия? Руминияга? Қаерга?».
Мамлакат президенти ҳарбийлар Украинани сақлаб қолиш учун курашаётганини, Украина эса оилалар ва ердан иборат эканини таъкидлади. «Агар одамлар кетадиган бўлса, кимни ҳимоя қилиш керак бўлади?», — деб сўради у.
«Мамлакат президенти: қоч, югур, мен ҳам сен билан қочаман, деса нима бўларди, билмайман», — дея қўшимча қилди у. «Кечирасиз, бу тирик қалқон дегани эмас, йўқ, бу бошқа масала».
Россия Украинага қарийб тўққиз ой аввал, 24 февралга ўтар кечаси бостириб киришни бошлаган эди. Уруш бошланганидан кейин Киев Зеленский мамлакатда «охиригача» қолишини маълум қилди.
Ноябрь ойи бошида Украина бош вазири Денис Шмигал Киев ва жанговар ҳаракатлардан узоқ бўлган бошқа шаҳарлардан эвакуация фақат фавқулодда чора сифатида кўрилишини айтди. «Сизда ҳар доим Б режаси бўлиши керак, аммо ҳозир вазият бундан йироқ», — дея қўшимча қилди у.
Изоҳ (0)