Олий Мажлис Сенати раисининг биринчи ўринбосари Содиқ Сафоев бошчилигидаги Ўзбекистон делегацияси Франция пойтахтидаги Броняр саройида ўтказилган «Кўп қиррали инқирозни бартараф этиш» мавзусига бағишланган 5-Париж тинчлик форумида иштирок этди, деб хабар бермоқда Дунё» ахборот агентлиги.
Қайд этилишича, форумда бир қатор давлатлар президентлари, халқаро ташкилотлар, компаниялар, тараққиёт банклари, жамғармалар, нодавлат нотижорат ташкилотлари раҳбарлари қатнашган.
Тадбир халқаро муносабатлардаги замонавий тамойилларга бағишланган. Иштирокчилар ўз чиқишларида иқлим ўзгариши, COVID-19 пандемиясининг салбий оқибатлари, тенгсизликнинг кучайиши, шунингдек, глобал оқибатларга олиб келадиган янги ва узоқ давом этган давлатлараро можаролар каби соҳаларга эътибор қаратган.
Маълумот учун: Париж тинчлик форуми 2018 йили президент Эммануэль Макрон ташаббуси билан жорий муаммоларга аниқ ечимлар ва жавобларни аниқлаш мақсадида глобал бошқарув муаммолари билан шуғулланувчилар ўртасида юқори даражадаги фикр алмашиш платформаси сифатида ташкил этилган.
Содиқ Сафоев Франция пойтахтига ташрифи доирасида Сенат, Миллий ассамблея, Ташқи ишлар вазирлиги, Лувр музейи, Араб дунёси институти, YESSEC бизнес мактаби ва Париж Пантеон Ассас университетида учрашувлар ўтказган.
Изоҳ (0)