Истанбулнинг марказий Фатиҳ туманида ҳозирча номаълум сабабларга кўра, бир автомобиль ёниб кетди, аланга шу атрофда тўхтаб турган бошқа машиналарни ҳам қамраб олди, айни пайтда эса ёнғин ўчирилган, деб хабар бермоқда Habertürk.
Нашр воқеа жойидан олинган фото ва видеотасвирларни ҳам эълон қилди. Кадрларда портлашга ўхшаган товушларни эшитиш мумкин.
Ёнғин оқибатида бешта машина ёниб кетгани маълум қилинди. Бундан ташқари, воқеа жойи яқинидаги бино ва банкомат ҳам зарар кўрган.
Yeni Akit нашри олти автомобилга зарар етгани ҳақида ёзмоқда.
Habertürk маълумотларига кўра, биринчи бўлиб ёниб кетган автомобиль ҳайдовчиси капот остидан тутун чиқаётганини сезганидан кейин Кожамустафа паша кўчасида тўхтаган. Шундан кейин аланга шу атрофга қўйилган бошқа машиналарга ҳам ўтган.
Машиналардан бири эса портлаб кетган.
Қурбонлар ёки жабрланганлар ҳақида ҳозирча маълумотлар йўқ.
Ўтган ҳафта Истанбул марказидаги Истиқлол пиёдалар кўчасида портлаш юз берган, олти киши ҳалок бўлиб, 81 киши жабрланган эди.
Истанбул Бош прокуратураси ҳодисани теракт деб баҳолади, беш нафар прокурор томонидан суриштирув олиб борилмоқда. Туркия ИИВ портлашни содир этган шахс қўлга олинганини маълум қилди.
Мавзуга доир:
Изоҳ (0)