АҚШ собиқ президенти Дональд Трамп 2024 йилги Америка етакчиси сайловида қатнашишини маълум қилди, деб ёзади CNN.
«Американи яна буюк қилиш учун мен бугун кечқурун АҚШ президенти лавозимига ўз номзодимни илгари сураман», — деди Трамп Флоридадаги Мар-а-Лаго қароргоҳида ўз тарафдорлари қаршисида нутқ сўзлар экан.
Бундан ташқари, Трампнинг вакиллари сайловларда қатнашиш учун Федерал сайлов комиссиясига ҳужжатларни тақдим этган.
Ўтган ҳафта собиқ президент «катта баёнот» беришини олдиндан эълон қилган эди. Трамп яқин орада ўз сайловолди кампаниясини бошлаши ҳақида Reuters ва The Washington Post ҳам маълум қилганди.
Айни вақтда сиёсатчининг баъзи иттифоқчилари Конгрессга оралиқ сайловлар натижалари туфайли, президент лавозимига номзодини қўйиш ҳақида эълон қилишни 6 декабрга қолдиришга даъват этганди. Шу куни Жоржияда сенатга сайловларнинг иккинчи босқичи бўлиб ўтади: Трамп томонидан қўллаб-қувватланган номзод Гершел Уокер демократ Рафаэл Уорнокка мағлуб бўлган, аммо уларнинг ҳеч бири 50 фоиз овоз тўплай олмаган.
Трамп 2017—2020 йилларда АҚШ президенти бўлган. 2020 йил январида у амалдаги президент Жо Байденга лавозимини бўшатиб берган. Трамп ўз мағлубиятини тан олмаган ва сайлов натижаларини суд орқали бекор қилмоқчи бўлган. Бироқ АҚШ Олий суди собиқ президентнинг овоз бериш якунларини қайта кўриб чиқиш ҳақидаги даъвосини рад этган.
Байден октябрь бошида 2024 йилги президент сайловида Трампни яна мағлуб этишига ишонишини айтганди. Шу билан бирга, амалдаги давлат раҳбари сайловда қатнашиш ҳақида қарор қабул қилганича йўқ, бироқ буни Конгрессга сайловлардан кейин ҳал қилишини айтган.
Изоҳ (0)