Москванинг Шереметьево, Домодедово ва Внуково аэропортларида 10 ноябрдан терактлар амалга оширилиши хавфининг максимал даражаси жорий этилган. Бу ҳақда «Известия» «Ространснадзор» (Транспорт соҳасидаги назорат бўйича федерал хизмат) авиакомпаниялар ва аэропортларга юборган хатга асосланиб хабар берди. Нашрнинг йирик авиакомпаниядаги манбаси хат келиб тушганини тасдиқлаган.
«2022 йил 10 ноябрь 00:00 дан транспорт мажмуаси фаолиятига ноқонуний аралашув бўйича теракт хусусиятига эга ҳаракат амалга оширилиши хавфининг тўғридан-тўғри даражаси белгилансин», — дейилади ҳужжатда.
«Ространснадзор» билдиришича, энди аэропортлар қўшимча хавфсизлик чораларини қабул қилиши керак. Шереметьево ва Домодедовода максимал даражадаги ҳимоя жорий этилишини қўллаб-қувватлашган. Внуково «Известия» сўровига жавоб берганича йўқ.
Бундан ташқари, Санкт-Петербургнинг Пулково аэропортида хавфсизликнинг учинчи даражаси киритилган, дея қўшимча қилди газета манбаси. Аэропорт вакили бу маълумот юзасидан изоҳ беришдан бош тортган.
Аввалроқ «Коммерсантъ» авиация соҳасидаги манбаларига таяниб, Марказий ва Жанубий федерал округлардаги Россия авиакомпаниялари ва аэропортлари ҳар куни хавфсизлик ҳақида ҳисоб беришни бошлаганини хабар қилганди.
Бундан ташқари, Шереметьево аэропортида «Набат» операциялари режаси бўйича (самолётни эгаллаб олиш сценарийси) мунтазам равишда машғулотлар ўтказилаётгани айтилганди. Внуковода эса «ёнғин, қўпорувчилик ва теракт содир бўлиши хавфи юзага келган тақдирда» А терминалидан эвакуация машқ қилинган.
Изоҳ (0)