Туркия ички ишлар вазири Сулаймон Сойлу Истанбулдаги портлаш муносабати билан АҚШ томонидан билдирилган ҳамдардликни Анқара қабул қилишдан бош тортишини маълум қилди, деб ёзади CNN Turk.
«Биз Америка элчихонасидан билдирилган таъзияни қабул қилмаймиз. Биз ҳеч кимга сотқинлик қилмаяпмиз, лекин бизга қилинаётган сотқинликка ортиқ чидаб туролмаймиз», — деди у ва Туркия ҳукумати «ҳужум қаерда мувофиқлаштирилганидан хабардор бўлганини» ҳам таъкидлади.
Аввалроқ вазир АҚШ Истанбулдаги теракт юзасидан билдирган расмий ҳамдардликни танқид қилган ва тез орада унга жавоб берилишини айтганди.
«Менимча бугун АҚШ томонидан эълон қилинган ҳамдардликни қотилнинг воқеа жойига биринчилардан бўлиб етиб келишига қиёслаш керак. Ва бу таъзияга муносабат жуда аниқ бўлади. Буни яқин келажакда кўрасиз», — деган у.
Туркия президенти 12 ноябрь куни АҚШ президенти Жо Байденни Анқарада тақиқланган FETO ташкилоти раҳбари Фатхулла Гуленни Пенсильванияда яшириб ўтиришда айблади. Туркия ҳукумати Гуленни 2016 йилги давлат тўнтаришига уринишда асосий жавобгар деб ҳисоблайди, унинг ўзи буни рад этади. Гулен АҚШда яшайди, Туркия уни экстрадиция қилишни сўрамоқда, аммо Вашингтон буни амалга оширмаяпти.
Бундан ташқари, Туркия Швеция ва Финляндиянинг НАТОга қўшилишига розилик берганича йўқ. Эрдўғоннинг айтишича, бу мамлакатлар Туркияда террористик деб тан олинган ташкилотлар, хусусан, Курдистон ишчилар партияси иштирокчиларига бошпана берган.
Истанбулдаги портлаш 13 ноябрь куни сайёҳлар орасида машҳур бўлган Истиқлол кўчасида юз берди. Олти киши ҳалок бўлиб, камида 81 киши жабрланди.
Истанбул Бош прокуратураси ҳодисани теракт деб баҳолади, беш нафар прокурор томонидан суриштирув олиб борилмоқда. Туркия ИИВ портлашни содир этган шахс қўлга олинганини маълум қилди. Аввалроқ Туркия вице-президенти Фуат Октай бомбани аёл киши портлатганини айтганди.
Ички ишлар вазири портлаш ортида Курдистон ишчилар партияси тарафдорлари турганини маълум қилди. «Бизнинг ҳисоб-китобларимизга кўра, буйруқ Кобанидан (Сурия шимолидаги шаҳар) келиб тушган, ҳужум ижрочиси эса Африндан (Сурия шимоли-ғарбидаги шаҳар)… Терговчилар қўлидаги далиллар портлашни ‘Демократик иттифоқ’ партияси (Курдистон ишчилар партиясининг Суриядаги жанговар қаноти) уюштирганини кўрсатмоқда», — деди Сойлу.
Изоҳ (0)