Туркияда Россия ва АҚШ вакиллари ўртасида музокаралар бўлиб ўтмоқда — ОАВ
Туркиянинг Анқара шаҳрида Россия ва АҚШ вакиллари ўртасида 14 ноябрь куни музокаралар бўлиб ўтмоқда. Бу ҳақда «Коммерсантъ» хабар берди.
Маълум қилинишича, Ташқи разведка хизмати директори Сергей Наришкин Россия томонидан Анқарага учиб кетди. Бу учрашув аввалроқ оммага эълон қилинмаганди. Музокара бўлаётгани ҳақида маълумот берган манба тафсилотларни очиқлашдан бош тортди. Россия президенти матбуот котиби Дмитрий Песков эса Анқарадаги музокаралар ҳақидаги маълумотни на тасдиқлай, на инкор қила олмаслигини айтди.
Россия ва Америка делегациялари охирги марта 2022 йилнинг 10 январида Женевада учрашиб, хавфсизлик кафолатлари бўйича музокаралар ўтказганди. Январь ойидаги музокаралар жараёнининг амалий натижалари йўқлигини кўпинча Украинада ҳарбий ҳаракатлар бошланиши учун дипломатик шарт сифатида қаралади.
The New York Times аввалроқ АҚШда мансабдор шахслар орасида Россия билан ярашув битимини тузиши учун Украинага босим ўтказиш масаласида зиддиятлар мавжудлигини маълум қилганди. Кейинроқ Зеленскийнинг Россия билан музокаралар учун шартлари ҳақидаги баёноти АҚШнинг «енгилгина турткиси» билан боғлиқ бўлгани ҳақида хабар берилганди.
