Москва Канаданинг 100 нафар фуқаросига нисбатан санкциялар киритиб, уларнинг Россияга киришини тақиқлади, дея хабар қилади «РИА Новости» мамлакат Ташқи ишлар вазирлигига таяниб.
Таъкидлашича, санкциялар «Канада бош вазири Жастин Трюдо режими томонидан Россия раҳбарияти, сиёсатчилар ва парламент аъзолари, бизнес вакиллари, экспертлар ва журналистлар, маданият арбоблари, шунингдек, ҳар қандай шахсга нисбатан жорий этилган санкциялар амалиётига жавобан киритилмоқда».
100 нафар Канада фуқароси учун Россияга кириш тақиқланди. Улар орасида юқори мартабали амалдорлар, ишбилармонлар, бандеризм тарафдори бўлган кўплаб ташкилотлар фаоллари, Россияга қарши фаол тарғиботчи бўлган оммавий ахборот воситалари ва молиявий тузилмалар ҳам бор, — дейилади вазирлик баёнотида.Вазирлик, шунингдек, 100 кишилик рўйхатни эълон қилди, уларга алоқадор шахслар доимий равишда Россия «стоп рўйхати»га киритилган. Улар орасида Канада алоқа хавфсизлиги бошқармаси раҳбари Каролин Ксавер, Канада Вазирлар Маҳкамаси ва Жамоатлар палатаси аъзоси Питер Маккей, Украина миллатчилари етакчиси Степан Бандеранинг набираси, журналист Стефан Бандера, таниқли актёр Жим Керри ва Канаданинг бошқа фуқаролари бор.
Актёр ва комик Жим Керри Украинадаги урушнинг дастлабки кунларида ўз Twitter саҳифаси орқали Россия президенти Владимир Путинга ишора қилиб, «улкан сиёсий аҳмоқликлардан юраги сиқилаётганини» айтган эди.
Изоҳ (0)