Россиядаги Псков давлат университетида таҳсил олаётган ўзбекистонлик талабаларнинг ўқишни ватанга кўчиришни сўраб президентга йўллаган мурожаати ижтимоий тармоқларда тарқалди.
Улар айни вақтда Россияда уруш сабаб юзага келган нотинч вазият Псков шаҳрига ҳам ўз таъсирини ўтказаётгани, шаҳарда огоҳлантирувчи ҳаво сиреналари чалинаётганини билдирган.
«Кундан кунга жиддийлашиб бораётган ҳолатлар бизни ва ота-оналаримизни хавотирга солмоқда. Сизга мурожаат қилар эканмиз, хавфсизлигимизни таъминлаб, юқори савияда билим олишимизга ёрдам берсангиз», — дейилади талабалар мурожаатида.
Октябрь ойининг бошларида Россиянинг Курск вилоятида ўқиётган ўзбекистонлик талабалар ўқишни Ўзбекистондаги ОТМларга кўчиришда ёрдам беришни сўраб президентга мурожаат йўллаганди.
Давлат комиссиясининг 7-сон баёни билан Россиянинг Украина билан чегарадош Курск, Брянск, Белгород, Воронеж, Ростов ва Краснодар ҳудудларидаги ОТМларида таҳсил олаётган Ўзбекистон фуқароларининг ўқишини Ўзбекистондаги давлат ОТМларига истисно тариқасида кўчиришга рухсат берилганди.
Шундан сўнг Қримдаги ўзбекистонлик талабалар ҳам бу борада президентдан ёрдам сўраб чиқди. Президент топшириғига асосан Қрим ва Севастопол ҳудудларидаги ОТМда таҳсил олаётган Ўзбекистон фуқароларининг ҳам ўқишини Ўзбекистондаги давлат ОТМга истисно тариқасида кўчиришга рухсат берилди.
Изоҳ (0)