Ўзбекистон мусулмонлари идораси раиси, муфтий Нуриддин домла ҳазратлари Умра зиёратидан қайтган айримлар хайрли ишларда ибрат бўлиш ўрнига кутиб олишдаги исрофларга йўл қўяётганига муносабат билдирдилар.
«Умрага борган одам Аллоҳ менга шундай ибодатни насиб қилибди, энди уйга қайтсам, маҳалладаги бева-бечоралар, етимларнинг бошини силайман, деган ниятда қайтиши керак эмасми?! Минг афсуслар бўлсинки, бу риёкорлик, бу дабдабаю асъасаларнинг ҳаммаси динимиз қайтарган амаллардир. Яна ачинарлиси, қайтиб келгандан кейин бу дабдабаларга уланиб кетадиган «ҳожи ўтиришлар»ни ташкил қилишяпти. Биргина «ҳожи ўтириш»ни ташкил қилиш учун бир камбағал фарзандини тўйига сарфлайдиган пулни ишлатишмоқда.
Сиз кибрланиб, эшигингиз тагида ҳаммага овоза қилиб, ҳаммани зиёфатга чақириб турган пайтингизда, бошқа бир фақир инсон боласини қандай уйлаш, қизини қандай узатиш ҳақида ўйлаб турганини унутмаслик керак. Ҳаммада ҳам Сизда бор имконият йўқлигини ҳисобга олинг. Қолаверса, бу амалларни холис Аллоҳ учун қилганингизда, савоби кўпроқ бўлардик. Бошқалар кўриши, эшитиши учун қилинадиган ҳар қандай амал катта гуноҳ бўлиб, қилинган ўша амалнинг савобини ювиб ташлайди.
Бу тадбирларда яна катта гуноҳлардан бири бу исрофдир. Аллоҳ Таоло Қуръони каримда «Енглар, ичинглар, лекин исроф қилманглар. Аллоҳ исроф қилувчиларни севмас» деб марҳамат қилган. Шундай ҳолатлар бўляптики, Умрага борган одам қайтиб келганидан кейин Умрага боришга сарфлаган пулидан 10 баробар кўп пул сарфлаб, маросим ўтказяпти.
Бир инсон олдимга келиб айтяпти, «Умрага боришга пулим бор, лекин қайтиб келганимдан кейин одам кутиб олиш учун йиғин ўтказишга пулим етмайди. Шу сабабли Умрага боролмайман». Шарит буни талаб қилмайди. Боринг, отахон, боринг онахон! Қўшнингизнинг дабдабаси сизни Умрга боришдек хайрли амалдан қайтармасин», - деди Муфтий.
Изоҳ (0)