Фарғона вилоятининг Қўқон шаҳридаги ИИБ биносида 15 ёшли бола вафот этгани хабар берилганди. Болалар омбудсмани Фарғонадаги ИИБ биносида вафот этган 15 ёшли ўсмир воқеасини жойига бориб ўрганди.
Қайд этилишича, 10 ноябрь куни Бола ҳуқуқлари бўйича вакил Алия Юнусова Фарғона вилояти Болаларни ҳимоя қилиш масалалари котибияти ҳамкорлигида Қўқон шаҳридаги ИИБ Вояга етмаганларга ижтимоий-ҳуқуқий ёрдам кўрсатиш марказининг фаолиятини ўрганган. Хусусан, мониторинг давомида болалар учун яратилган шароитлар, уларнинг соғлом овқатланиши, таълим олиши, ётоқ жойлари, уларнинг спорт билан шуғулланишлари ва бошқа ҳолатлар ўрганилган.
Бундан ташқари, Болалар омбудсмани марказда вақтинча сақланаётган болалар билан якка тартибда суҳбат ўтказди, уларнинг ижтимоий аҳволи, марказга келиб тушиш сабабларини ўрганган.
Мониторинг жараёнида иштирок этган давлат ташкилотларининг масъул ходимларига болаларни тезроқ ўз оиласига қайтариш, ижтимоий аҳволи оғир бўлган оилаларга амалий ёрдам кўрсатган ҳолда болалар назоратсизлигининг олдини олишга қаратилган бир қатор таклиф ва тавсиялар берилган.
Шунингдек, вакил Фарғона вилояти Қўқон шаҳридаги Вояга етмаганларга ҳуқуқий ёрдам кўрсатиш марказида жорий йилнинг 17 октябрь кунига қадар сақланган, Учкўприк тумани «Султон» маҳалласида яшаган марҳум 9-синф ўқувчиси А.Р.нинг хонадонида бўлиб, боланинг онаси ва яқин қариндошларига ҳамдардлик билдирган. Вакил бўлиб ўтган воқеа назоратга олинганини ва боланинг вафотида айбдор бўлган шахсларга нисбатан суд томонидан қонуний жазо берилишини таъкидлаган.
Марказда мониторинг давомида аниқланган хато ва камчиликлар бартараф этилиши юзасидан тегишли вазирлик ҳамда идораларга Бола ҳуқуқлари бўйича вакилнинг таклиф ва тавсиялари юборилади.
Марҳумнинг ўлими тафсилотлари
15-ёшли бола ўлими юзасидан аввалига 8 нафар вояга етмаган бола гумонланаётганди. Ҳолат юзасидан Қўқон шаҳар прокуратураси томонидан Жиноят кодексининг 104-моддаси 3-қисми «д» банди (қасддан баданга оғир шикаст етказиш жабрланувчининг ўлишига сабаб бўлса) билан жиноят иши қўзғатилган. Тергов мобайнида икки нафар вояга етмаган тарбияланувчи марҳум Р.А.ни уриб, унинг ўлимига сабаб бўлган тан жароҳатлари етказгани маълум бўлган.
Изоҳ (0)