- Farg‘ona viloyatining Qo‘qon shahridagi IIB binosida 15 yoshli bola vafot etgani xabar berilgandi. Bolalar ombudsmani Farg‘onadagi IIB binosida vafot etgan 15 yoshli o‘smir voqeasini joyiga borib o‘rgandi.
Qayd etilishicha, 10-noyabr kuni Bola huquqlari bo‘yicha vakil Aliya Yunusova Farg‘ona viloyati Bolalarni himoya qilish masalalari kotibiyati hamkorligida Qo‘qon shahridagi IIB Voyaga yetmaganlarga ijtimoiy-huquqiy yordam ko‘rsatish markazining faoliyatini o‘rgangan. Xususan, monitoring davomida bolalar uchun yaratilgan sharoitlar, ularning sog‘lom ovqatlanishi, ta’lim olishi, yotoq joylari, ularning sport bilan shug‘ullanishlari va boshqa holatlar o‘rganilgan.
Bundan tashqari, Bolalar ombudsmani markazda vaqtincha saqlanayotgan bolalar bilan yakka tartibda suhbat o‘tkazdi, ularning ijtimoiy ahvoli, markazga kelib tushish sabablarini o‘rgangan.
Monitoring jarayonida ishtirok etgan davlat tashkilotlarining mas’ul xodimlariga bolalarni tezroq o‘z oilasiga qaytarish, ijtimoiy ahvoli og‘ir bo‘lgan oilalarga amaliy yordam ko‘rsatgan holda bolalar nazoratsizligining oldini olishga qaratilgan bir qator taklif va tavsiyalar berilgan.
Shuningdek, vakil Farg‘ona viloyati Qo‘qon shahridagi Voyaga yetmaganlarga huquqiy yordam ko‘rsatish markazida joriy yilning 17-oktabr kuniga qadar saqlangan, Uchko‘prik tumani “Sulton” mahallasida yashagan marhum 9-sinf o‘quvchisi A.R.ning xonadonida bo‘lib, bolaning onasi va yaqin qarindoshlariga hamdardlik bildirgan. Vakil bo‘lib o‘tgan voqea nazoratga olinganini va bolaning vafotida aybdor bo‘lgan shaxslarga nisbatan sud tomonidan qonuniy jazo berilishini ta’kidlagan.
Markazda monitoring davomida aniqlangan xato va kamchiliklar bartaraf etilishi yuzasidan tegishli vazirlik hamda idoralarga Bola huquqlari bo‘yicha vakilning taklif va tavsiyalari yuboriladi.
Marhumning o‘limi tafsilotlari
15-yoshli bola o‘limi yuzasidan avvaliga 8 nafar voyaga yetmagan bola gumonlanayotgandi. Holat yuzasidan Qo‘qon shahar prokuraturasi tomonidan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lsa) bilan jinoyat ishi qo‘zg‘atilgan. Tergov mobaynida ikki nafar voyaga yetmagan tarbiyalanuvchi marhum R.A.ni urib, uning o‘limiga sabab bo‘lgan tan jarohatlari yetkazgani ma’lum bo‘lgan.
Izoh (0)